Omupresidende gwehangano lyaanangeshefa lyedhina NALOBA Dr Erastus Chicco Shapumba okwa indile aanangeshefa opo ya longele kumwe oshoka oya pumbwathana.
Shapumba okwa li ta popi nena komatango piitendele ya longekidhilwa owina kOshana Regional Council mehala lyedhina Caribbean Recreational Park mOshakati.
Iitendele oya li ya longekidhilwa yamwe yomwaamboka ya li koshigongi oshinene tashi kundathana omikalo nkene aanangeshefa ye na oku ninga omapungulo miikondo yehumokomeho lyoshitopolwa shaShana.
Oshigongi shika tashi tumbulwa kutya “Oshana Regional Investment Conference” sha ningilwa mOngwediva osha tameka nena notashi hulu momasiku 24 gaAguste.
“Tu longeleni kumwe ongaanangeshefa. Inatu shindathaneni,” Shapumba ta ti sho a pewa ompito a gandje oshipopiwa.
Mboka ya li ya gongala omwa li mwa kwatelwa Gavena gwaShana tate Elia Irimari, Meya gwaShakati tate Leonard Hango, aawiliki yaNCCI osho wo yaNALOBA, naantu yalwe ye thike lwopomilongo hetatu.
“Onga omunangeshefa owu na oku kwathwa komunangeshefa omukweni. Ongeshefa onshona otayi kwatha ongeshefa onene,” Shapumba ta ti.
“Ngaye onda teleiningwa kutate Aupa, manga nda li okamatyona.”
Omuwiliki gwaNALOBA okwa indile wo aanangeshefa opo yaaha thigepo oongeshefa dhawo e taya lamba aanapolitika pethimbo lyiikonga yomahogololo.
“Ngele oho thigi po ongeshefa, to ende to shindi aanangeshefa yakweni … Sho to ka galuka kongeshefa, aanangeshefa yakweni otaye ku fadhuka po,” Shapumba ta ti.
Okwa indile wo opo aanangeshefa ya kwathe aakwashigwana mboka ye li mompumbwe.
“Ngele to ende poshipangelo, u wete omuntu ta nyengwa … owu na oku mu kwatha, opo tu topolelathaneni okashona hoka tu na.
“Tangi unene kompito. Kandi shi lela omupopi, ngaye omunangeshefa. Ongeshefa oyo oshipewa shandje.”
Methano: Dr Erastus Chicco Shapumba ta popi piitendele ya longekidhwa kOshana Regional Council.
