Uuministeli wEtanga lyEgameno nIipambele yOonakulwa Aakulu owa tseitha eso lyaKomanda Ndjai Dumeni Solomon Hawala, ngoka a li komanda omutiyali gwetanga lyegameno lyaNamibia pokati koomvula 2000 sigo 2006.
Hawala ngoka a li a tseyika noshilukadhina “Jesus” pethimbo lyekondjelomanguluko okwa tseithwa ohela a hulithile megumbo lye momukunda Ohakweenyanga mOshana.
“Nakusa Komanda Ndjai Hawala okwali a valwa momasiku 19 Aguste 1935 momukunda Efidilomulunga, popepi nOngwediva, mOshitopolwa shaShana,” osho Kolonela Petrus Shulumbu a ti momushangwa.
Shilumbu ngoka oye omupopiliko gUuministeli wEgameno nIipambele yOonakulwa Aakulu okwa ti Hawala okwa li a ningi oshilyo shoSwapo momumvo 1962, nokwa yi muupongekwa mo1964.
“Omanga e li muupongekwa, Ndjai Hawala okwa dheulilwa uukwiita moKongwa shaTanzania mo1965, moNorth Korea momumvo 1968, osho wo muSoviet Union momumvo 1981.
“Okwa kutha ombinga, a ninga oompangela, nokuwilika omalugodhi ogendji oku lwitha omatanga guukoloni gaSouth Afrika moshitopolwa shaKaprivi Strip omanga a li moZambia. Okwa longo wo moondondo odhindji, mwa kwatelwa sho a li Omukwatheli gwaKomanda gwOmatanga omutiyali okuza mo1975 sigo 1979, osho wo Komanda gwoPevi gwOmatanga mo1979 sigo sho omatanga gekondjelomanguluko gahulithwa po mo1989.”
Hawala okwa li wo oshilyo shongundumutima yoSwapo mo1977 sigo 1990, osho wo shoPolitburo mo1981 sigo 1990.
Pethimbo lyemanguluko mo1990 okwa ningi oshilyo shetanga lyegameno lyoshilongo e na ombandi yuuMayola Ndjai nokwa pewa oshilonga shuuKomanda gwOmatanga. MuDesemba gwo2000 okwa ulikwa a ninge Omukuluntu gwOmatanga gEgameno, sigo mo31 Kotoba gwo2006.
Methano: Komanda Ndjai Solomon Hawala.
