Epangelo lyaNamibia olya tula po oshimaliwa shi thike poomiliona dhaNamibia 145 opo ku andjakanekwe omakwatathano gonetiweka oshilongo ashihe.
Ndhika odha popiwa kuminista gomauyelele nomakwatathano gopaungomba meme Emma Theophelus sho ohela a gandja pambelewa okatenda konetiweka momukunda Epinga mOshitopolwa shaHangwena.
“Okatenda hano konetiweka otaka ulike ehumokomeho lyaayehe,” Minista Theofelus ta ti.
Okwa ti wo kutya iilonga mbika ya longwa mpano otayi ulike eitulo mo lyaNamibia oku fala omayakulo gopaengodhi nomakwatathano gopashinanena kwaayehe pwaa na nando ondjoolola yasha, nenge omuntu onakale peni.
Ngashiingeyi aantu otaya kala ye li mekwatathano li li nawa uunandoka taya pumbwa omayakulo gasimana gaashi gopaunamiti, gelongo, nopamahupilo.
“Okatenda hano konetiweka mEpinga otaka ulike kutya hamuntu ta thigala konima, unene tuu mboka ye li komahala huka gokuushayi,” Theofelus ta ti.
Gavena gwaHangwena meme Kadiva Hamutumwa okwa pandula iilonga mbika nokwa ti oya simana unene koshigwana shomEpinga nomikunda dhaahoka.
“Okatenda otaka ka kwatathanitha aantu, aapambele, aanangeshefa, aalongwa, osho wo iiputudhilo nomandiki, mokutaambathana omauyelele, okugandja elongo, uuhaku, noompito dhiilonga,” Hamutumwa ta ti.
Okatenda haka oko kamwe ka tungwa kuMTC palongelo kumwe noCRAN noke na onetiweka yi na oonkondo.
Uutenda woludhi nduka otawu tungwa papolohalama yedhina Universal Service Fund (USF), nota ku tungwa wo wumwe kiitopolwa ngaashi Kavango East, Kavango West, Oshikoto naKunene.
Ngele awuhe owa pu otawu ka gandja omakwatathano gonetiweka yo4G kaantu ya gwedhwapo ye li 4765 mboka ya kala kaaye na onetiweka.
Methano: Okuza kolumoho, Shipopyeni Moses: Omupeha gwamwene gomukunda Epinga, Elvis Nashilongo: Omunashipundu gwopevi gwaCRAN, Dr. Tulimevava Mufeti: omunashipundi gwaCRAN, Festus Ikanda: Kansela gwaOmundaungilo, Emma Theofelus: Minista gomauyelele nomakwatathano gopaungomba, Linda Aipinge: omuwiliki goshikondo moMICT, Emilia Nghikembua: omukuluntuwiliki gwaCRAN naFillemon Johannes: omukuluntu gopevi mo MICT.
