Osekundosikola yopombanda yedhina Shaanika Nashilongo mOkahao oya li ya pewa oongulu dhosikola hetatu kuMTC naMVA fund metitano lya zi ko.
Osikola ndjika yi na aalongwa ye li 1157 oya mono ngeyi uuwanawa mbuka okupitila mopolohalama yokutungila oosikola dhokuushamba oongulu dhosikola ndjoka ya tamekwa momumvo 2020.
Peegululo lyoongulu ndhika opwa li Kansela gwOshikandjohogololo shaKahao tate Leonard Shikulo, osho wo omukuluntu gwomayambulopo gaaniilonga niilonga yomakwatho mehangano MTC tate Tim Ekandjo, osho wo yalwa.
Sho a popi poshiithanene omunashipundi gwelelo lyosikola yaShaanika Nashilongo tate Michael Simeon okwa ti oya pandula unene kekwatho ndika.
Ihe tate Simeon okwa indile ishewe opo andola pu kale gumwe ngoka ta vulu oku iyamba a gandje iipundi mbyoka ngashi ngeyi ya pumbwa oku tulwa moongulu moka.
Methano: Oobloka mbali dhoongulu hetatu oompe posikola Shaanika Nashilongo.
