Ku Martin Negumbo

OMVULA ndjoka ya loko oshiwike shino oya pendula oomwenyo dhoyendji mboka oomwenyo dhawo dha kala dha lindimana molwa oshikukuta shomvula ya zi ko. Iitopolwa oyindji mOnooli yoshilongo oya mono omata ga gwana nogeshi ku pandulwa.

Nonando aakalimo yomOnooli oya li ya ningi ethimbo nuule ya tega shiyenga yi ga tenteke pevi e tayi kutha po uupyakadhi woshikukuta shoka sha lumbu ko, omvula onene notayi nyanyudha oya loko moshitopolwa shaShana okuza Omaandaha noyali wo natango tayi ulike iikogo yi li nawa notayi vulu ku ga dhenga po natango uule womasiku.

Aakalimo oyendji yomomikunda dhokOnooli oyo aalimimapya osho wo aaniimuna, noya kala ya dhengwa noonkondo sho omvula inayi loka nawa omumvo gwa zi ko shoka she etitha eteyo lya nkundipala momapya yo iimuna tayi si nonando epangelo lya kambadhala mpaka naampeyaka oku kondjitha oshikukuta.

Onkalo yomwiidhi ngashingeyi otayi ulike tayi galukile kuuwanawa shoka shi li sha nyanyudha aaniimuna noonkondo.

Omusamane Mitili Lisias ngoka oye omukalimo gomukunda Otalanawa okwa lombwele oshikundaneki shika nkene u uva nawa sho omadhiya guudha omeya pethimbo ndika.

Aakalimo wo yatatu yomikunda dhi li popepi nOndangwa ye na omapya oya ti oyuuvite enyanyu enene sho omvula ya loko nawa nuumvo, e taya popi kutya yamwe yomuyo oya tameke nale okupululitha kuyele oshoka omumvo gwa piti momapya inamu ya zila sha shopepunda.

“Omvula ndjika ya loka notayi tsikile noku loka otayi etitha oonkondo noye tu pa omukumo gokulonga lela neyitulo mo,” osho omusamane Sebastian Katito a lombwele Omutumwa.

Omvula oya loka nawa momikunda ngaashi Omaalala, Otalanawa, Ashaaga, nopEheke osho wo omikunda odhindji dhaShana. Omafuma oga zima. Aantu oya nyanyukwa.

Ethano: Omeya apehe mpo.