Martin Negumbo /
Konyala kehe omukunda gu li kOnooli yoshilongo ogu na po olukanda nenge uundunda mpoka oshigwana hashi kala po pomathimbo gomutenya sigo komatango shi ikuthe enota oshowo oku tsakanena nookuume ya kundane shoka tashi inyenge moshilongo.
Nonando pe na aantu yamwe haya menekele po poondingosho, aantu oyendji ohaye ya po ngaa uunandoka ya mana iilonga yawo yesiku ndoka.
Ano pomalukanda ohapu kala aantu oyendji.
Uuministeli wuundjolowele nuukalinawa woshigwana nande hawu kala tawu kwandjangele noku uvitha ko aantu kombinga yesimano lyuundjolowele, opu na oshinima shimwe shoka shi na oku tulwa miilonga kuyele molwaashoka osha guma onkalo yomuntu kehe. Oshinima shika osha pamba onkalo yomalukanda goshigwana momikunda.
Omalukanda ogendji nande ga ndhindhilikwa nawa kutya ohaga kala aantu esiku nesiku okuza ongula sigo okongulohi kage na uundjugo wu li pamuthika.
Oshikundaneki shOmutumwa osha li sha talele po olukanda lwedhina Amunganda ndoka lu li mOshikandjohogololo shaNdangwa Rural.
Olukanda nduka nande taku hokololwa lwe ya po nale momimvo dhonale nolwa ende talu koko e talu ningi olunene sigo opo mpaka oluna ashike uundjugo wuli une, ndele kawu shi wakehe omuntu ihe owoohandimwe mboka ye wu tula po. Ya ningila ookastoma dhawo omanga olukanda nduka olwa thikama po kuundingosho wu li 46 lwaampoka.
Puundunda mbuno ohapu kala aantu ya thika pomilongo hamano esiku kehe, omanga pomathimbo giituthi iinene ngele aanuushimba ye ya ohapu kala aantu taye ihilile komathele gaali.
Molwa ompumbwe ndjika yuundjugo aantu yamwe ohaya ikwathelele konima yomakuma nenge mepya lyi li popepi mpoka.
Pethimbo Omutumwa a li a pula gumwe gomaanangeshefa polukanda ndoka kutya omolwashike ye na oku kala haya iwatelele konima yomakuma shono inashi yogoka, omunangeshefa omushona gumwe okwa ti kaye na nkene oshoka inaya pewa omahala mpoka taya vulu oku tunga uundjugo wawo.
Onkalo oyi li ngaaka ondhigu pokuma pwaa na uundjugo wokwiiwatela omanga pu na aantu taya nu unene nosha nika oshiponga kuundjolowele woshigwana.
Methano: Olukanda lwaAmunganda
