Oolopota dhopolisi otadhi ulike kutya iipotha yi thike po17,669 yomahepeko gopaukashikekokantu oya li ya lopotwa muule womimvo dho2020 sigo 2023.
Iipotha yomahepeko gatya ngeyi yi li 4,516 oya li ya lopotwa momumvo 2023. Aakiintu oyo ya li iihakanwa oyindji, ye li oopelesenda 81.2 miipotha mbika.
Omapekapeko go2023 guundjolowele kiitopolwa ayihe moNamibia oga mono kutya oopelesenda 33 dhaakiintu yoomvula 15 sigo 49 oya li ya ningilwa omahepeko gokolutu okuza sho ya li noomvula 15, omanga oopelesenda 15 oya li ya ningilwa omahepeko gopamilalo.
“Ihe omiyalu ndhika otadhi ulike ashike okathano okashona,” Meme Christophine Iyambo osho a ti.
“Ehangano lyUuhaku mUuyuni olya koneke kutya aantu mboka ya ningwa iihakanwa olundji ihaya popi mo omahepeko ngoka, tashiti omukundu gwomahepeko otashi vulika lela gu li pombanda.”
Iyambo ngono oye omunambelewa e na sha niipambele yuukashikekokantu osho wo opolohalama yoHamuntu Nando Ta Thigala Po moombelewa dhIigwana Hangano moNamibia, okwa thamuna kutya omahepeko guukashike kokantu ohaga etitha omaupyakadhi gopamadhiladhilo.
Okwa ti olundji omuntu ta piti momahepeko oha tameke ta lunduluka mokukala kwe, ta monika a ngwangwana, nenge ta kala hiimwenene, ye ta kala ta monika keeuvite ombili.
“Ano ngano ogo etameko lyomandhindhiliko guupwakadhi wopamadhiladhilo,” Iyambo ta ti.
“Nonando Uuministeli wUuhaku nOnkalonawa yOshigwana, melongelokumwe noWHO osho wo UNFPA, oya dheula aaniilonga yuuhaku ye vulithe po300 ya gandje omakwatho kiihakanwa yomahepeko, omakwatho gopamadhiladhilo natango omashona,” Iyambo ta ti.
Okwa ti opu na ompumbwe opo aantu mboka taya adhika muupyakadhi womahepeko opo ya mone ekwatho lya gwana opo ya kale inaya gwila muupyakadhi womadhiladhilo omawinayi.
Methano: Ethano tali ulike omahepeko gaakiintu ga hulithwe po. (Lyakuthwa kosowetanlive).
