“Uushiinda wa teka” – Okahokololoyolithipukululi
kuMartin Negumbo //
Omusamane Shimweetheleni okwa li a tungila momukunda Otalanawa popepi nEheke lyoongulu nokwa li a panga uukuume nomusamane gwomimvo dhe gwopuushiinda tatekulu Mbodes Elago.
Aasamane mbaka oya kala ethimbo nuule taya longele kumwe noku kwathathana miinima oyindji ngaashi aashiinda yAandonga hayeshi ningi.
Ihe esiku limwe omusamane Mbodes okwa li a landa ondjembo yepwakolwa nokwa li a nyanyukwa noonkondo oshoka oondjembo odha kala kaalumentu yolela.
Ano olyomakaya yimwe tate Mbodes okwa li a zi megumbo lwomoshanga shomutenya e ki ikuthe oongonyoto momagulu. Okwe endele ondjila ndjoka ya pita maandjakuume ke Shimweetheleni. Okwa adha momugongo gumwe mu na omuntu a lala ashike ka li e mu dhimbulula nawa lela.
Molwaasho Mbodes okwa kala nomanganga ye sho e na ondjembo ngeyi nokuli oku na okuninga omanyami, okwa yelutha ondjembo mombanda e ta igidha ta ti: “Olye nguno a lala!”
Omusamane Shimweetheleni okwa li eshi ewi lyamushiinda, no ina keuka a tale kumukwawo ihe okwa yamukula owala newi lyombaatha ta ti: “Mushiinda ongame mwene gwalyo, otandi iyutha po kashona sho u wete nda lala okangali kombwa ngeika.”
Mbodes mokuuva ndhika okwa fa owala a telekelwa. Okwa yi mo newi lya nika onyati: “Ito vulu oku lala okangali kombwa kaa! Uungali woombwa nawu lalwe koombwa dhodhene ndele hakaantu nande nande.”
Omusamane Shimweetheleni sho a dhenge omeho mumukwawo te ende u uka kuye nani omuntu oku na ondjembo. Shimweetheleni okwa li a haluka noonkondo.
“Omolwashike to lala okangali kombwa te ti? Koye ota ka lalwa kulye?” Mbodes ta pula mukwawo ngawo.
Omusamane Shimweetheleni okwa tameke ta kakama konima sho a lombwelwa kutya ina lala okangali kombwa ihe na lale okangali kemwene.
“Ondi wete ngaa uumbwa waayeni hawu tokelwa owala tawu gwedha wo ihawu lala noho, nani omolwaasho ho lala po uungali wawo! Nashi mone ehulilo sho,” Mbodes ta ti ye ta dhenge oshitako shondjembo pevi.
Shimweetheleni okwa li ta kakama noonkondo; ando omuntu ka li omukuluntu ando oto ti okwa li a hala oku isitamena.
“Hahaha, mushiinda, mushiinda owa tila ano? Otandi shendjula owala mukwetu! Ushi tuu kutya ngaye ogomashendjo.”
Aasamane oya kala po kashona taya paathana ombili, nokupulathana nkene ya lala po nokuuhala momagumbo. Mbodes ta tsikile nondjila ye.
Ihe Shimweetheleni nani okwa li a haluka tuu shili nokwa tila. Sho a yi megumbo okwa lombwele omukadhi nkene e endwa kumukwawo.
“Mbondesa keshi omuntu nani, okwa hala okudhipaga ndje iipundjamenye.”
Okuza mpono uushiinda wa teka. Aalumentu mbaka ya ningi kadhila nalimalima. Shampa Mbodes ta zi hono ye Shimweetheleni ota ti tyeni kemo.
Oshilongwa: Omuntu iha ningwa omashendjo nondjembo.
