Omalovu naga nuwe nawa
Martin Negumbo / Omukuluntuwiliki|
Omalovu oga kala haga nuwa okuza muuyuni wonale wookuku. Sigo onena otaga nuwa natango nonande Uukriste wiihanene oshitunda.
Ihe uupyakadhi kawu li ashike mpo sho omalovu taga pukitha oshigwana mondjila yokegulu, ihe omalovu otaga pukitha wo oshigwana mondjila tayi fala kehumokomeho lyomuntu nolyoshigwana.
Oshoshili kutya omalovu nago oga kala ga kutha ombinga mokuyambulapo eliko lyoshilongo shetu Namibia oshoka melanditho lyomalovu oyendji omo haya mono omboloto.
Ihe opu na mboka ya kala taya nyenyetelitha omahangano ngoka haga dhungu omalovu ge li pamuthika nopondondo yokunuwa.
Aantu ohaya nyenyetele omahangano omadhungi dhingi moshilongo molwa omiyonena tadhi holoka moshigwana molwa uukolwe.
Ngame ondi li omugundjuka gopokati ndele onda koneke kutya iikolitha nande oyi li hayi nyanyudha aantu oyi na wo uupyakadhi muyamwe mboka haya pitililitha okunwa kwawo nohaya ka ninga iinima iiwinayi lwanima uuna yanu.
Ano otandi kunkilile oshigwana opo shi nwe ngaa kashona opo ku yandwe omalugodhi, iiponga yomiiyenditho nosho wo omakwatonkonga inaaga tegelelwa.
Olundji omiyonena inaadhi longekidhwa ohadhi holoka uuna aantu ya nwa omalovu, naashika oshi li ompinge noveta yoshilongo nohashi ka etitha okwiipa omausama sho Omiya dhaShinana tadhi ka kala tadhi ungaunga nomuntu konima sho uukolwe wa pu mo.
Pakathimbo haka nandi pandule aalandithi yiikolitha mboka haya pata pethimbo lya uthwa nosho wo aanwi yomalovu mboka haya nu ndele omalovu ihaga yi iilonga yawo moshipala.
Peha lyoshikundaneki ote hugunine netumbulo kutya mboka tamu nu nweni nuukeka, naamboka ihaatunweni ina tu kambadhaleni oku ilonga iikolitha nande nande.
