Gavena gwOshitopolwa shaKavango-Uzilo tate Bonifatius Wakudumo okwa li a indile opo pu kale elongelokumwe ewanawa pokati kombelewa ye nOmbaanga yomayambulopo goshikondo shuunamapya nuuniimuna yedhina Agribank.
Gavena Wakudumo okwa ti okwa hala okulongela kumwe naAgribank oshoka oku na omadhiladhilo noompangela dhoku yambulapo oshikondo shuunamapya moshitopolwa.
Wakudumo okwa li a popi ndhino sho a li a popi moshigongi shoonkundathana dhokutula uukunikumwe sha longekidhwa kuAgribank sho ta kongo omayele nomaiyuvo gaantu mboka ye na ombinga moshikondo shuunamapya nuuniimuna.
Oshigongi osha li sha ningilwa moRundu oshiwike sha ziko.
“Osho oshinima tashi yemateke unene sho iitopolwa yetu iyali yaKavango ya tulwa mongundu yiitopolwa mbyoka ya hepa noonkondo omanga otse tu na omeya ogendji oshowo evi li na oonkondo nolya opala okulima omapya niikunino oshowo okumuna iimuna,” Gavena Wakudumo ta ti.
“Onda hala opo konima yoomvula ntano sho tandi zi mo mombelewa ndjika yuugavena ndi kale nda eta oshitopolwa shandje pondondo yokulonga iikulya oyindji.
“Ano otandi indile Agribank opo a ye nangame moonkundathana e tatu tula po elongelokumwe lya kola.
“Kombinga yevi, ondi na ekwatathano ewanawa nale nomalelo gopamuthigululwakalo. Otatu vulu oku mona evi lya gwana ndyoka tali vulu li longithwe moshimpungu shuunamapya nuuniimuna. Ileni ashike mutalelepo oopoloyeka ndhoka tu na nale moshitopolwa shetu.”
Kombinga ye omukuluntuwiliki gwaAgribank tate Sakaria Nghikembua okwa ti okwa taamba ko eindilo lyagavena.
“Nani otatu hingileni tuu kombinga yimwe. Ngame naaniilonga yandje otwa tala ko osho oshinima sha simana okulongela kumwe nombelewa yagavena. Ano otwe ilongekidha oku longela kumwe,” Nghikembua ta ti.
Methano: Oye Gavena gwaKavango-Uzilo Bonifatius Wakudumo
