Martin Negumbo|
Minista gOmaudhano, Aagundjuka nOmayakulo goPashigwana meme Agnes Tjongarero okwa li a patulula pambelewa oshikunino shiihape shi li pEheke mOshikandjohogololo Ondangwa yoKomikunda.
Oshikunino-polojeka ndjika oya kwatelwa komeho kaagundjuka yahamano.
“Opolohalama yoopolojeka dholudhi nduka oyi li miikandjohogololo ayihe yoshilongo nonande ya yooloka ashike kiikunomwa yadho. Oopolojeka ndhika otadhi kwathele aagundjuka momukalo goku ya pa iilonga opo ya hume komeho,” meme Tjongarero ta ti ngawo.
Minista okwa ti shika otashi gandja wo uunongo kepipi lyoomvula okuza pomimvo 16 sigo 35 mboka taya vulu oku kutha ombinga momangeshefelo.
“Uuministeli wandje otawu ka kwashilipaleka kutya aagundjuka otaya mono omakwatho gopashimaliwa opo shiya kwathe ya tameke oongeshefa dhawo.
“Otandi mu kumagidha ashike amuhe aagundjuka opo mu longe sha shomupondo opo mu yambulepo oshigwana mokulonga neitulomo noku eta po shoka tashi pumbiwa,” Tjongarero ta ti.
Gavena gwOshitopolwa shaShana tate Elia Irimari ngoka oshipopiwa she sha leshwa peha lye komuniilonga mombelewa ye meme Kristofina Nakanduungile okwa indile aanyasha ya gwanithe po iilonga yawo opo oopoloyeka dhi taandele moshitopolwa ashihe.
Oshikunino shika shuunamapya oshi li ookilometa mbali okuza kopate onene yaNdangwa naShakati popepi nokapate komamanya hoka kuuka kEheke. Opoloyeka ndjika oya dhikwa moshitopolwa shaShana mOshikandjohogololo sha Ndangwa yoKomikunda pomudhingoloko gwaEheke.
Oshikunino shika osha kalela po oshikandjohogololo ashihe shaNdangwa Rural, noshikunino osha tegelelwa shi ka dheule aanyasha ya thika po84 methimbo efupi.
Methano: Minista gwaagundjuka meme Agnes Tjongarero ta konakona uukwatya wongushu yoombuto dhiihape yomoshikunino.
