Omusamane gumwe gwomuhoko gwAahakaona okwa li a kuthile ko kashona Omutumwa kombinga yuupyakadhi mboka gwe ya enditha ondjila onde okuza koshilongo shawo koKoloka muumbugantu-uninginino waAngola sigo ye ya oku tula mOshitopolwa shaMusati, mokandoolopa kedhina Ruacana.
Omusamane nguka negumbo lye oye li mongundu yaantu omathele ya yakulwa moshitopolwa oomwedhi mbali dha yi.
“Otwa ningi oomvula ne inatu lokwa koshilongo shetu, niimuna ayihe oya si po. Momiimuna omo hatu hupile,” Mwantanika Mberia osho a hokolola.
“Otwa zi ko nduno opo tu konge mpoka tatu vulu oku mona uuhupilo oshoka aantu otwa sa ondjala. Nokuli otwa kanithila yakwetu yamwe mondjila ngaashi aakulupe, aakiintu aasimba, osho wo oohembundangele.
“Sho twe ya muka otwa yakulwa nawa lela. Oya ti natu kale mpaka, opo ya kale tayetu kwatha nokutu pa iikulwa. Aantu yaamuno ohaye tu pe iikulya lela. Ngashingeyi otu li nawa. Otatu ya pandula unene. Epangelo lyoshilongo shino osho wo aaleli yasho otatu ya pandula.”
Mberia okwa ti aantu oyendji oya yi kiitopolwa yokOpuwo, mboka ya thigala koKoloka oyomboka ya nyengwa lela oku kutha omalweendo unene mboka ye li muunkundi womalutu ngaashi aakulupe.”
Omusamane nguka ngoka ina enda osikola na keshi kutya oku na oomvula ngapi okwa ti ohaya kambadhala oku konga iilonga ihe oshidhigu.
“Aantu ohaya ti kape na iilonga, yamwe otaya ti ngaa tegeleleni nge pwa monika oompito dhiilonga tumu ithane.”
Mberia oku na aakulukadhi yatatu nuunona uhetatu, omanga aakulukadhi yaali oyeli momategelelo.
Methano: Mwantanika Mberia noshigwana she ye li konima yokapangelo kaMwana waTihozu mOshifo hoka oko ya dhika uutenda wawo.
