Oondoolopa dhOshitopolwa shaShana adhihe ndatu Oshakati, Ondangwa nOngwediva otadhi longekidha momukokomoko gwomumvo 2020/2021 opo pu kale oopolota dhi thike po 1730 dhi tungwe omagumbo.
Ndhika odha li dha popiwa kuGavena gwoshitopolwa Oshana tate Elia Kaulifewangali Irimari sho a gandja oshipopiwa she shokomumvo shokuhokolola uukwatya woshitopolwa.
“Iilonga yokugandja omagumbo gombiliha kaakwashigwana osho eshongo enene moNamibia,” Irimari ta ti, “ihe ombelewa yandje oya kala yi li moonkundathana noondoolopa dhetu ndatu osho wo oombaanga opo ku monike omikalo omiwanawa tadhi ningi aakwashigwana yetu yiiyemo yopevi ya mone omagumbo.
“Ongaoshizemo shoonkundathana dhetu, ombaanga yedhina Letshego oya tameka oku longekidha omilandu dhomikuli tadhi ka gandja oshimaliwa moonkambadhala dhokutunga omagumbo gombiliha taga tungwa taku longithwa iilongithomwa yi ili mOndangwa.
“Shika oshinima shishi okupandulwa, nondi inekela oombaanga oonkwawo adhihe otadhi kutha ko oshiholelwa mokulongekidha oshimaliwa shokutungitha omagumbo taga vulika kwaayehe.”
Gavena okwa ti ishewe kutya molwa eyindjipalo lyaakwashigwana yomoondoolopa otashi pula opo ku gandjwe oopolota dhomagumbo osho wo dhoongeshefa.
“Nandi shi ulike wo kutya omalelo goondoolopa dhetu dhomOshana oge ipyakidhila niilonga yokulongekidha ku ningwe omalukanda omape.
“Omalukanda omape 11 oge li taga longekidhwa moshitopolwa ngoka kwa tengenekwa ga ka kale ge na oopolota dhi li 1,765 (eyuvi omathele gaheyali omilongo hamano nantano,” Gavena Irimari ta ti.
Gavena oshipopiwa she okwa li eshi gandja metitano lyaziko mOshakati.
Methano: Omagumbo gamwe ga tungwa mOshakati kuNHE oomvula dha piti. (Ethano kuNHE).
