Omuprofessori Mburumba Kerina, ngoka pamahokololo gondjokonona taku tiwa oye a gandja edhina opo oshilongo shi lukululwe ‘Namibia’ pethimbo lyuukoloni mpoka kwali haku tiwa osho South West Afrika, okwa fumvikwa momawendo gomoKhomasdal.
Shika osho oshinima sha ningwa lwotango mondjokonona yoshilongo Namibia shamanguluka omunenentu ta fumvikwa momawendo gaathigona nonando kasha li pahalo lye.
Omusamane Kerina okwa li omunapolitika ngoka a li oye gwotango oku fala oshipotha shaNamibia kIigwana yaHangana pethimbo lyuukoloni. Kerina okwa longa pamwe nayakwawo mongundu yoSwapo pondje yoshilongo, ihe okwa kala gumwe a li ina hala oku kutha ondjembo mokulwitha oombulu.
Okwa li e wete oombulu tadhi vulika ashike pakudhilwitha momukalo gwokweenda moondunge ngaashi oku pula iilongo yaEuropa naAmerika yi tulile mo South Afrika gwokatongotongo oondjindikila sigo oombulu dhe ya koongolo.
Pethimbo lyemanguluko Kerina okwa galukile wo koshilongo konima sho a kala moNew York shaAmerika moka a li ha longo moUnivesiti yaahoka.
Ihe okwa kala okathimbo e li mongundu yompilameno, nolwanima sho e li mepipi lyuukokele opo nduno a galukile moSwapo.
Nonando a mana oondjenda omwedhi gwa zi ko e li oshilyo shongundu tayi pangele, okwa li a popi kutya okwa hala ngele a hulu ko opo a fumvikwe kOkahandja momawendo gaawa yAaherero. Oontamanana odha tukuka sho yamwe ya tameke oku ninga oompangela dhefumviko mOkahandja nonando yamwe inayeshi nyanyukilwa.
Elelo lyOmuthigululwakalo gwAaherero olya yi kOmpangu tali pula ku gandjwe elombwelo opo Kerina kaa fumvikwe momawendo gAakwaniilwa moka. Elombwelo nolya gandjwa kOmpangu tali ti kutya nakusa Kerina ina fumvikwa mo nando momawendo ngoka.
Aakwanezimo yaKerina oya kutha nduno onkatu opo a ka fumvikwe momawendo gaKhomasdal mOvenduka ngoka ogo omawendo gaakwashigwana mboka ye na iiyemo yopevi.
Olundji aanenentu ohaya fumvikwa komawendo gaPioneerspark mOvenduka.
Sho a dhengelwa ongodhi a tye ko sha tate Alfredo Hengari ngoka oye omupopiliko gwombelewa yOmupresidende ina kutha po ongodhi.
Methano: Ewendo moka mwa fumvikwa Omuprofessori Mburumba Kerina.
