Ehangano limwe lyomombunga yoongeshefa dhoOhlthaver & List lyedhina O&L Leisure Hotels and Lodges olya ti olya tula po ompangela yoku tetula oowili dhaaniilonga osho wo oku pata iinyangadhalwailonga yimwe opo ongeshefa yi kale inayi teka po.
Ekepulo lyoowili dhiilonga otali ka ninga opo aaniilonga ya ka kale wo taya futwa shiikolelela koowili ndhoka dha longwa.
Shika otashi ti aaniilonga otaya ka kanitha iiyemo pethimbo ndyoka taya longo ethimbo lya ngambekwa.
“Uupyakadhi mboka we etithwa koCovid-19 moshikondo shaatalelipo, osho wo oonkambadhala dhepangelo okukandeka omukithi osha ningi opo iiyemo yetu yi kale ya gwa pevi,” omukuluntuwiliki gwoO&L Leisure Norbert Wurm osho a popi momukanda gwa tuminwa iikundaneki.
“Opo tu kaleke po ongeshefa yetu osho wo omauwanawa gaaniilonga, katu na omukalo gulwe ndele oku tula po omukalo tagu kwatha tu pite mo momashongo ngano twa taalela pakathimbo. Ano otwa tokola opo tu ngembule ko kiilonga yetu shi ikwatelela kethimbo lya tengenekwa noshi li pamulandu gwOmpango yAaniilonga mokatendo 12,” Wurm ta popi.
Etetulo lyoowili dhiilonga otali tameke momasiku 1 lyaAguste sigo 30 gaSepetemba nuumvo.
Wurm okwa ti ooloondja dhawo ndhoka tadhi ka gumwa kwaashino ongaashi oChobe Water Villas naMokuti Etosha Lodge ndhoka tadhi ka kala dha pata manga sigo lyotango lyaKotoba.
Yo oStrand Hotel Swakopmund otayi ka kala ya patulukila iilonga ihe onethimbo lyiilonga yangambekwa, omanga oFarmhouse Dell yawo tayi kala ya patulukila ashike aatalelipo yawo mboka ye li mo nale osho wo aantu mboka taya landa sha nokuya.
OMidgard Country Estate otayi ka kala ya patulukila iilonga ayihe yesiku notaku kala wo omadhewulo osho wo iilonga yokutunga mbyoka ngele ya pu otaku ningwa e egululo pambelewa komaandelo gaSepetemba.
Ihe oO&L Leisure Central Office otayi ka shunitha pevi oowili dhiilonga pokati koopelesenda 25 sigo oopelesenda 50, she ikwatelela kiilonga mbyoka ya pumbiwa okulongwa, dho oondjambi dhaaniilonga otadhi futwa ngaa shi ikwatelela koowili dha longwa.
“Ngaka ogo omathimbo omadhigu, nando twa li twa inekela kutya uupyakadhi mbuka otatu wu sindi nziya, ihe ngashingeyi otu na ompito opo tu pite mo muupyakadhi sho tatu longele kumwe,” Wurm ta ti.
Omupopiliko gwehangano lyoO&L meme Roux-Che Locke okwa lombwele Omutumwa ta ti kutya aaniilonga yawo mboka ya gumwa komalunduluko ngaka oye li 495, go omahangano gaaniilonga oga popiwa nale nago molwa oshinima shika.
