Okuza sho uupyakadhi woCovid-19 wa tameke tawu indjipala, Epangelo lyaNamibia okupitila mUuministeli wIinima yoPondje nElongelokumwe, olya indile opo li yambidhidhwe kUukumwe wAaeuropa mOshilongitho shEgameno lyOshigwana.
Epangelo lyaNamibia otali gandja olupandu molwa eyamukulo lye endelela okuza kEpangelo lyaSoomi (Finland), ndyoka lya gandja iizalomwa yokwiigamena mbyoka ya pumbiwa unene mokukondjitha oCovid-19, oshowo ekwatho lyEhangano lyAaeuropa ndyoka lya kwatha momalweendo giipumbiwa mbika.
Iipumbiwa mbika oya thiki ohela komatango nondhila moNamibia pokapale kaHosea Kutato noya yakulwa kuMinista Netumbo Nandi-Ndaitwa ngoka oye wo Omupevi Pilima Minista, opamwe nOmuambasada gwOsheendo shaEuropa meme Sinikka Antila.
Ano shi ikwatelela keindilo lyekwatho lyopaulumompumbwe lya pulwa kuNamibia, Soomi okwa gandja uumasika wu li oomiliyona 2,36, osho wo uuigamenithi wokomeho wu li 200 000, nomaguyo gomoshitandelo ge li 30,000, oowenda 100,000 nuukonakonitho woCovid-19 wu li 189 000 opo Namibia a kondjithe omukithi nguka gwoCovid-19.
“Osha kala oshinima sheetitha ohenda shili sho oshikondo shuuhaku shaNamibia sha kala shi li sha wililwa po, niipangelo ya kala muupyakadhi molwa embombolokelo mo lyaanuuvu yoCovid-19. Soomi okwa hala okuthikama muukumwe wanankali pamwe naantu yaNamibia pethimbo ndika edhigu,” tate Matti Karvanen, ngoka oye omutiyali moEmbasi yaSoomi ta ti ngawo.
Iilongitho mbika ya gandjwa oya pitila melongekidho lyoEU Civil Protection Mechanism onga onkambadhala yUukumwe waEuropa mokukondjitha oCovid-19. Uukumwe waEuropa owa gandja ekwatho lyiiyenditho moku thikitha omakwatho ge na sha noCovid-19.
“OEU otayi yamukula meendelelo konkugo yaantu yaNamibia,” Ambasada gwaEU kuNamibia Omusimanekwa Sinikka Antila ta ti.
“Okupitila moCivil Protection Mechanism, otatu kwatakanitha nokuendelelitha oshilonga shoku eta iilongitho yuuhaku nekwatho kiilongo ngaashi Namibia, tashi ulike uukwawo wanankali waantu yaEuropa molwa iilongo mbyoka ya wililwapo kuupyakadhi nomukundu womukithi gwokorona,” Antila ta ti.
Methano: Omapakete ngaka gaza kuEuropa oga thiki moNamibia ohela, ga eta uumasika niikwawo oyindji yokulwitha oCovid-19.
