Aanafaalama oya li taya shi enditha nawa pethimbo lyomadheulo ngoka ga gandjwa koAgribank iiwike yaziko moshitopolwa shaOmaheke noshaOtjozondjupa.
Molwashoka aanafaalama oyeli ya tegelela ethimbo lyomvula, Ombaanga ndjika yaanafaalama oAgribank oya li ya longekidha omadheulo gaanafaalama miitopolwa mbika iyali yokuushimba, moka aanafaalama ya yooloka ya li ya kutha ombinga.
Omunambelewa omunawino miikwafaalama yoondjuhwa osho wo iikwamboga tate Hanks Saisai okwa ti: “Ootundi osho wo omadheulo oga li ga nuninwa mboka ye li komahala gokomaushayi opo wo nayo ya mone uuyelele wa pumbiwa ngaashi wu na sha niipaluthi yiimuna, uundjolowele wiimuna, okumuna oondjuhwa, iilonga yiikunino nankene ofaalama yi na oku kalekwa po.”
Saisai okwa ti ishewe kutya “omadheulo ngaka oga li ga ningwa opo ku longekidhwe aanafaalama sho omuloka gu li popepi, yo ya kale ya mona uuyelele nkene ye na oku ka longa ya likole oshindji miilonga yawo, yo taya palutha oshigwana.”
Saisai okwa gwedha ko ta ti iipopiwa yimwe ngaashi shi na sha niikwandjuhwa, iikwamboga, osho wo iikwalusiyana oyi li ya pumbiwa noonkondo pethimbo ndika. Aanafaalama oya li nduno ya pula opo ya endithwe po ishewe miipalanyolo mbyoka.
Agribank okupitila moshikondo shawo shoAgri Advisory Services Division ohaya gandja omadheulo nootundi opo aanafaalama ya mone elongo kombinga yiilonga yawo yuunangeshefa womoshimpungu shuunamapya nuuniimuna.
Aanafaalama ohaya pewa wo omauyelele gankene ye na oku sinda omaupyakadhi nomashongo ngoka ga taalela iilonga yawo.
Aanafaalama ye thike po175 oya enda mo momadheulo ngaka gaAgribank goshali. Yo aakiintu oyo ye li omwaalu ogundji gwaamboka ya kutha ombinga.
Methano: Aanafaalama mbaka otaya konkolwa opo ya ka longe iilonga tayi palutha oshigwana.
