Ompangu yaMangestrata mOvenduka oya tokola nena kutya Michael Amushelelo naDimbulukeni Nauyoma otaya kala mondjedhililo sigo sho taya ka holoka ishewe mompangu momasiku 5 gaJuli nuumvo.
Mbaka yaali oya li ya mangwa po momasiku 13 gaMei nuumvo konima sho ya li ya unganeke ehololomadhiladhilo noku ninga oonkambadhala opo ehala lyomalandithilo lyedhina Chinatown mOvenduka li patwe.
Amushelelo ngoka e li gumwe gomaawiliki yongundu yopolitika yedhina Namibia Economic Freedom Fighters (NEFF), naNauyoma ngoka e li gumwe gomaawiliki yongundu yaanandjungu yedhina Affirmative Repositioning (AR) oya li ya kutha onkatu yoku kambadhala okupatitha oositola dhAachiina oshoka oya li ya geyithwa kehangano lyedhina Namibia Revenue Agency (NamRa).
NamRa okwa li a geyitha mbaka konima sho a popi kutya okwa fika po iizalomwa niinima yilwe yaahe na ongushu nuuthemba wokulandithwa moshilongo.
Iinima mbika otaku tiwa oya li ya kuthwa aakwashigwana yaNamibia, nonando NamRa lwanima okwa ka popya kutya oyindji yomuyo inayikuthwa aakwashigwana.
Efikopo lyiinima mbika ya li ya tengenekwa yi na ongushu yoomiliona ntano olyo lya geyitha Amushelelo naNauyoma e taya ti kutya nani oositola dhAachiina nadhi pate oshoka ohadhi landitha wo iinima yaahe na ongushu.
Mbaka yaali oya li ya mangwa po e taya patululilwa nduno iipotha mwa kwatelwa shokupiyaganeka ombili yoshigwana, okuya oveta moshipala, nokuhwahwameka aakwashigwana opo ye ikuthile oveta.
Sho ya holoka lwotango mompangu oya li oshipotha shawo sha tsilikwa komasiku ga5 gaJuli, ihe oya li ya tulitha mo oshipotha shoku indila ompito yoku ifutila mo manga taya tegelele esiku lyepangulo.
Ihe Mangestalata Masule Kwezi okwa gandja etokolo nena kutya mbaka yaali naya kale mondjedhililo tuu sigo esiku lyawo lyokupangulwa.
Ihe ongundu yoNamibia Economic Freedom Fighters oya li uunambo ya nyolele omukuluntu gwopolisi kutya ongundu otayi ka kala tayi ningi omahololomadhiladhilo oshilongo ashihe ngele mbaka yaali eindilo lyawo lyoku ifutila mo olya ekelwahi kompangu.
Methano: Epulakata ndyoka lyali tali popi kutya Amushelelo naNauyoma ngele inaya mangululwa nena (24 Mei) otapu ti pwaka.
