Ehangano lyOshiketha shOopenzela dhAaniilonga yEpangelo (GIPF) olya ti otali konaakona uulingilingi taku fekelwa wa longwa kaaniilonga yehangano ndika.
Shika osha popiwa momushangwa gwa pitithwa kuGIPF lwanima sho ngoka a li nale Meya gwaVenduka Dr. Job Amupanda a li a nyola komalungula ta ti opu na uulingilingi wa ningwa kaaniilonga yaGIPF sho ya nyola uusilepa tawu ti otaku futwa oshimaliwa tashi yi kiiputudhilo yelongo lyopombanda, ihe oshimaliwa shoka nani osha tulwa mooakaunda dhopaumwene dhaaniilonga mboka.
GIPF momushangwa gwa tuminwa iikundaneki okwa ti okwa kutha pakathimbo aaniilonga yaali opo ku ningwe omakonaakono itaga piyaganekwa.
“Oshiketha oshi na omulandu gokwaaha tala onteni uulingilingi wokulunga itapula nenge omukalo kehe guukengeleledhi neyako, noshe itula mo mokulonga nuudhiginini opo ku vudhwe mo uulingilingi woludhi kehe,” omukuluntuwiliki wiinima yina sha nomakwatathano moGIPF tate Edwin Tjiramba ta ti ngaaka.
Tjiramba okwa gwedha ko ta ti oshigwana otashi indilwa opo shi longe pamwe naGIPF oku lopota efekelo nomaihumbato kehe ga nika uulingilingi waaniilonga.
Sho a pulwa kOmutumwa opo a gandje uuyelele wa gwedhwa po, unene tuu omadhina gaaniilonga mboka ya kuthwa miilonga pakathimbo manga taku ningwa omakonaakono, Tjiramba okwa ti pamulandu gwawo inashi pitikwa oku gandja omadhina gaaniilonga taya ningilwa omakonaakono oshoka omuntu kehe okwa talika ko kee na ondjo osigo ongele a monika ondjo konima omakonaakono ngele ga pu.
“Ano itashi kala muuwanawa waGIPF nenge waaniilonga mboka oku pititha omadhina gawo ngashingeyi omanga omakonaakono inaga pwa,” Tjiramba ta ti.
Methano: Tate Edwin Tjiramba gwaGIPF.
