Onga ongeshefa yoshigwana ndjoka mwene gwayo oye Epangelo lyaNamibia, Namib Diamond (PTY) LTD, a tseyika nefupipikodhina NAMDIA, okwa li a nyanyukwa oku taamba ko Omupresidende Dr. Hage Geingob sho ohela a li a talele po oombelewa oonene dhongeshefa ndjika mOvenduka.
Ehiyo lyOmutse gwOshilongo olya li lya ningwa onga shimwe shomiinyangadhalwa mbyoka yi na oku kala ya ningwa methimbo lyuule womasiku 100 gopetameko gameme Alisa Amupolo e li omuwiliki omupe gwongeshefa ndjika yokulanditha okawe.
NAMDIA sho ta tameke oshikako shoomvula ntano dhiilonga yokuipushula nokugwedhela ko kewangandjo lye, ano etalelopo ndika olya li nelalakano lyokuulikila omuleli gwaNamibia iilonga yaNAMDIA nomalalakano ge.
Oshiithanene osha li sha kalwa kOmupresidende Geingob ngono oye a li omuyenda a simana, ihe opwa li wo Minista gwOomina nIikwankondo Tom Alweendo ngoka a li a kwatha mokutaamba ko aayenda.
Omusamane Bryan Eiseb ngoka oye omunashipundi gwElelo lyaNAMDIA, nomuwiliki gwaNAMDIA Alisa Amupolo opo wo ya li.
Omupevi Minista gwOomina nIikwankondo Kornelia Shilunga, omuwiliki guuministeli woomina niikwankondo Simeon Negumbo, osho wo Ambassador Leonard Ipumbu ngoka e li omuwiliki gwiipumbiwa yuupresidende opo wo ya li.
Miinyangadhalwa yetalelopo omwa li mwa kwatelwa epatululo pambelewa lyondunda ya lukilwa Dr. Hage G. Geingob moka omo hamu ningilwa iigongi ya simana yongeshefa ndjika NAMDIA; osheendo osha talele po wo ehala lya gamenwa moka hamu longelwa okawe.
“Elelo lyaNAMDIA, Ewiliko lyoPombanda osho wo aaniilonga ayehe otwa nyanyukwa sho twa talelwa po ngeyi kOmutse gwOshilongo, osho wo kompito sho twa ulike iilonga mbyoka hatu longo,” AaNAMDIA osho ya ti ngawo momushangwa.
“Tse AaNAMDIA otwe itula mo mokutunga po edhina lya kola noli na uuntsa notali tula okawe kaNamibia momalandithilo guuyuni.”
Methano: Talako ta!! Omupresidende Hage Geingob ta tala nenyanyu, nonkumwe nonohokwe okawe kaNamibia nkene ka tya.
