Aapolisi yokoongamba mboka haya kondolola nokugongela iishoshela yokongulu okuza miilandithomwa tayi piti poongamba dhoshilongo oya pewa omuzalo omupe.
Momushangwa omupopiliko omukuluntu gwaNamRA tate Tonateni Shidhudhu okwa ti omuzalo omupe otawu zalwa okuza nena, notashi ka ninga opo aanambelewa mbaka yokoongamba ya kale ya zala naanaa ya opala ngaashi aanambelewa yakwawo yokoongamba miilongo oyindji haya kala taya monika.
“Esimano nepondolo enene mwaashika olyo okutsa omuthindo molwa iilonga tayi tsikile yaNamRA ‘okukala oye endiki lyopondondo yopombanda egongeli lyiiyemo yepangelo okuza miishoshela’,” Shidhudhu ta ti.
Omuzalo otawu gandja wo etumba kaaniilonga mbaka nomukumo molwa iilonga yawo yakehesiku.
Omuzalo owa li wa gandjwa wu zalwe okuza nena mesiku lyokudhimbuluka iilonga yaagongeli yiishoshela niifendela muuyuni, sha li sha ningwa nena mOshikango.
Esiku olya li lya kalwa kaanambelewa aanene yaNamRA mwa kwatelwa omuwiliki gwaNamRA tate Sam Shivute.
Aapolisi oya li ya maashinga okuza koongamba dhaNamibia naAngola e taya piti mondoolopa yaShikango.
Methano: Yamwe yomaapolisi mboka ye li wo aanambelewa yaNamRA haya longele koongamba taya ende ya zala omuzalo wawo omupe.
