Oshiwike shaziko ehangano lya yama kepangelo ndyoka hali kondolola omakwatathano gopangodhi lyedhina Communications Regulatory Authority of Namibia (CRAN) olya li lya pititha uuyelele kutya itashi kala we tashi dhengele opo omuntu a gandje omanyala ngele ta nyolitha okakalata ke kongodhi.
Ihe ehanganongeshefa ndyoka hali gandja omakwatathano gopangodhi lyedhina Mobile Telecommunications (MTC) olya popi ohela tali ti lyo otali tsikile owala nomukalo gwalyo gwoku pula aantu ya gandje omanyala gawo ngele oya hala uukalata wawo woongodhi wu nyolithwe.
Ompango ndjoka tayi kondolola omakwatathano gopangodhi otayi ti uukalata awuhe woongodhi nawu nyolithwe, dho omilandu dha tulwa po kuCRAN otadhi ti kutya uukalata mboka tawu ka kala inawu nyolithwa sho omumvo 2023 tagu ka pwa ko otawu ka kala wa tetwa mo mombepo.
Ihe omananathano oge li po sho MTC a tula po omulandu gwe kutya ota nyolitha owala uukalata waantu mboka taya gandja omanyala gawo osho wo uumutse, nuuyelele tawu ulike mpoka omuntu ho zi.
“Osha gwana ngele omuntu ta gandja okamutse, nehala mpoka ha zi,” omukuluntu gwaCRAN Emilia Nghikembua ta ti.
Ihe MTC ota ti aawe.
“Uuyelele ngaashi mboka womanyala owu lile po oku gandja egameno lya gwedhwa po, notawu ka kwatha mokukandeka uukengeleledhi niimbuluma, notashi pe ookasitoma dhetu uuwanawa molwa omayakulo getu,” Tim Ekandjo ngoka oye omupopiliko omukuluntu gwaMTC ta ti.
Ekandjo okwa ti kutya MTC okwa nyanyukilwa ookasitoma dhawo ndhoka dha nyolitha nale uukalata wawo noya gandja omanyala gawo.
“Konena ndji uukalata wu li 1,002,032 (omiliyona imwe oshinkwanu mbali) owa nyolithwa nale.
“Ano MTC ota tsikile nokupula omanyala gomuntu kehe ngoka te ke ya a hala okakalata ke ka nyolithwe.”
Methano: Tate Tim Ekandjo nameme Emilia Nghikembua
