Meya gwElelo lyOndoolopa yaOngwediva tate Taarah Shalyefu okwa li a nyanyukwa unene molwa aagundjuka mboka ya hogololwa opo ya kale aawiliki yondoolopa ndjika moshikondo shelelo lyaagundjuka.
Oshikondo shelelo lyaagundjuka mondoolopa ndjika osha li sha totwa po momumvo 2009.
Nuumvo aagundjuka ye li 18 ya za moosikola dhi li mOngwediva oya li ya pewa oshinakugwanithwa shelelo lyaagundjuka yaNgwediva momasiku 5 gaKotoba, e taya kumikwa opo ya ka longe neitulo mo miinakugwanithwa yawo.
Aagundjuka mbaka oya li ya pewa omadheulo gomasiku gaali momwedhi Aguste, ya endithwa po nkene ye na oku kala aakomeho yoshigwana shaagundjuka mOngwediva.
Shalyefu okwa ti nonando aagundjuka mbaka itaya ka pewa ofuto yasha molwa iilonga ya simana taye ke yilongela ondoolopa ndjika, ondjambi yawo otayi ke ya momikalo dhi ili.
“Otwa tseyeni kutya uuwiliki owa simana unene moshigwana, oshoka kehe shimwe ohashi thikama po nenge shigwe po she ikolelela kewiliko ndyoka li li po,” Shalyefu ta ti.
“Uuwiliki otawu tameke mepipi eshona, oku longekidhila aawiliki oshilonga shuuwiliki monakuyiwa, opo ya ka kale miipundi yuuwiliki moshigwana.”
Shalyefu okwa gwedha ko wo ta ti aagundjuka mbaka otaya ka kala noshinakugwanithwa shoku pukulula aagundjuka opo yaaha thige po oosikola, yo ya kale ye na esimaneko, nokukaleka po wo omidhingoloko dha yela.
“Nandi mu kuthile ko: otamu ka tsakaneka omashongo. Otamu ka tukwa noku ulwa nayi. Ihe inamu iteka, longeni oshilonga sheni nomukumo.”
Methano: Meya Taarah Shalyefu pamwe nokangundumutima kelelo lyaagundjuka yondoolopa yaNgwediva.
