Minista gUuministeli wUunamapya, Uuniimuna, Omeya nEtopolululo lyEvi tate Calle Schlletwein sho a li mEenhana omasiku ga piti okwa li a popi kutya masiku hamale enota nuupyakadhi womeya mondoolopa yEenhana osho wo komahala gopopepi otayi kala omikundu dhomonakuziwa.
Schlletwein okwa li a wilike osheendo sha li sha ka tala nkene ominino dhomeya dhoshinano shookilometa 200 tadhi yalwa okuza kOmafo dhuuka kEenhana.
Omeya ngano taga kala haga zi mevi moomboola mOshitopolwa shaHangwena otaga ka kandula po omukundu goku kala taku nuwa omeya haga zi kOshakati, ngoka haga zi kOkalueke koAngola.
Methano ndika otamu monika tate Elijah Ngurare ngoka oye omunambelewa gwopevi omukuluntu moshikondo shomeya, osho wo Minista Calle Schlletwein, natate Abraham Nehemia ngoka oye omukuluntuwiliki gwaNamWater, omanga kolulyo taku monika elenga enene lyoshikandjo shEenhana tate Efraim Weyulu, taya yala ominino momukunda Oshandi gu li ookilometa 20 okuza mEenhana.
