Aakalimo ye li 31 yondoolopa yaEenhana oya li ya dheulwa noku pewa uunongo nkene ye na oku longa iikunino osho wo oku tsika omiti dhiiyimati.
Mbaka oya li ya dheulwa pakwatho lyoshimaliwa sha li sha gandjwa kehangano lyIigwana yaHangana lyedhina Food and Agriculture Organisation of the United Nations (FAO).
Omadheulo oga li ga ningwa momwedhi Aguste nuumvo ihe oonzapo odha li dha gandjwa mulyotango lyaNovomba.
Egandjo lyoonzapo olya li lya ningwa komukuluntuwiliki gwaFAO Dr Diao Quiyun opamwe naMayola gwEenhana tate Omri-Onn Kavandje.
Mboka ya li ya dheulwa oya li wo ya pewa omiti opo ya ka tsike momagumbo gawo.
Oshinyangadhalwa shika oshomopoloyeka yedhina “Omukalo gwOkweeta po Iikunomwa mIilando” ndjoka tayi ka ninga opo Eenhana yi kale ondoolopa yimwe moNamibia yi na omiti odhindji osho wo iimeno momapandaanda.
FAO ota kwatha oondoolopa odhindji muuyuni, ano mwa kwatelwa Eenhana, opo ya tsike omiti dhomuzile nodhiiyimati. Shika mEenhana otashi ningwa palongelo kumwe nUuministeli wOmidhingoloko, Iihwa nOmatalelopo.
Opoloyeka ndjika oya li ya longekidhilwa oshimaliwa shi thike pomiliona yimwe, notayi ke ya pehulilo momasiku 31 gaDesemba nuumvo.
Methano: Yamwe mboka ya li ya pewa oonzapo, sha ningilwa moEenhana Convention Centre.
