Ongundu yopolotika yedhina Independent Patriots for Change (IPC) nena oya gandja elombwelo kutya oya kutha mo ookansela yayo yaali mewiliko lyOndoolopa Ovenduka molwashoka otaya finywaafinywa kutya oya longa oshilonga shi li ompinge nuuwanawa woshigwana.
Mboka ya kuthwa mo miilonga oyo tate Fillemon Hambuda nameme Desree Davids.
IPC ndjoka yi na mo ookansela yane mElelo lyaVenduka oya ti oya li ya tula po okangundu taka konakona ookansela dhawo shi na sha neihumbato ewinayi osho wo okulonga iilonga yi li pondje yomulandu gwekotampango lyongundu.
Ekonakono lya ningwa koIPC olya li lya ningi omapulaapulo opo ookansela mboka ya gandje uuyelele kongundu, osho wo aanambelewa yomelelo oya li ya pulwa ya gandje elongelo kumwe.
Sho kwa ningwa omapulaapulo oIPC oya indile opo yi pewe oondokumende dhi na sha niilonga yElelo lyaVenduka, ihe Elelo olya tindi oku gandja oondokumende ndhoka opo IPC yi ninge omakonakono gayo e tayi ningi etokolo lyahugunina.
Momasiku 6 sigo 7 Aguste 2021 okwa li kwa ningwa oshigongi nookansela mboka ye li moshikumungu shika, nokuza mpono ewiliko lyoIPC olya tokola opo li kuthe mo ookansela dhayo mboka Hambuda naDavids.
Davids okwa li tango a kuthwa mo pakathimbo miilonga yuukansela waVenduka omwedhi gwa zi ko sho kwa li kwa lopotwa kutya okwa pewa opolota inashi pitila momilandu, ihe Hambuda ngoka a kala omunashipundi wewiliko lyondoolopa okwa li a kuthwa mo pakathimbo miilonga e ta konakonwa shi na sha nuumbashu mboka wa li wa hanagulwa po kElelo omwedhi gwa zi ko mOvenduka.
“Molwaashoka Elelo lyaVenduka olya tindi oku gandja elongelokumwe, ewiliko lyoIPC oli na oshinakugwanithwa opo ongundu yi gandje omadhina (omape) gaamboka taya longo muuwanawa woshigwana osho wo pamulandu gwoveta.
“Ano ongundu yetu oyi na oshinakugwanithwa opo yi konakone, lyo Elelo oli na oshinakugwanithwa opo li gandje elongelokumwe noIPC osho wo oongundu dhilwe opo ku kalekwe po uuyuuki, osho wo iilonga iiwanawa yookansela dhetu.
“OIPC oya gana okulwitha uulingilingi notayi ningi ngawo pamikalo adhihe tashi vulika, opo ookansela dhetu ya longe muuwanawa woshigwana,” Ewiliko lyoIPC ta li popi ngawo.
