KuDr Edward T. Shikesho /
Efiku limwe mexuliloshivike onda kufile omhito ndi ka ninge omapekapeko e na sha neendado doikulya noikunwa yOshiwambo.
Oshinima sha kufifa nge unene momutumba osheshi kutya onda landele oikulya yokoshingolo ndi wete i na ondilo ya kwata moiti, naashi osha fininika nge handi lipula kutya ‘omolwashike oikulya noikunwa yetu yopamufyuululwakalo i na ombilixa unene?’
Onda landele oshilama shoxuxwa mofitola imwe yonhumba. Onda li nee handi lipula kutya kashiimba oshi na nande N$25.00 lwaapo, mboli oshilama oshi na o-N$50.00.
Onde lipula natango nda fikama manga kutya omolwashike oshilama shoxuxwa tashi kosho oshimaliwa shi fike apa? Okutya ngaho, oxuxwa moku i makela oipu ashike nainai, nashi handi li onda fa ashike handi li omafulafula, hano ihe na omulyo woxuxwa. Mbela eexuxwa edi hadi kulu ashike momwedi.
Omanga nee ndi li pokapundi kamwe popepi nofitola, mwaame omwe ya omalipulo mahapu kombinga yoikulya yOshiwambo. Onde lipula kutya eexuxwa edi haku tiwa odOshiwambo, vamwe otava ti odomwenyo, omolwashike hano hatu di landifa kombilixa?
Ngeenge owa i nande opomatala opOshakati opo ile ngaho nande omOndangwa omo, nomOvenduka ngaho, eendado odi li pedu unene. To di hange koshimaliwa pokati ko-50 fiyo 100, ndele oshilama shoxuxwa mofitola oshi na 50?
Natu ye nee poikunwa, oomeme otava uhala tava kolo eengongo, ve li momyoongo omo tava dulu nokulikila mo keendje, vo ove na natango okuhumbata oitoo yokukolela, ndele ovo venya tava kolo mo omaongo.
Ndele vati ehalasha limwe oli na eedola omulongo ile N$15.00. Oshili otava mono mo nee shike? Tala nee, oliitela imwe yo-Amarula oto i hange kefele nasha. U tale nee kodjove ile komaxuku, oixuna oi fike peni! Okanhepe kodjove ke na N$20.00.
Nghee ngaho meekulu ta kolo eengongo, ndele te di kukutike, ndele te di tende (opo nda uda kutya oomeme vahapu ova kanifila po ominwe davo), ndele ta tongona omaxuku, ndele te a mwangula koshini, ndele ta yenge nee, ndele omaadi te a fulukifa pediko, ndele oshili ote ya okulandifa okanhepe keedola 20?
Tala omaadi osolo naa eenyiki mofitola kutya oku na ingapi!
Fyeni Ovawambo nafye eendado detu natu di tule pombada.
Oto hange omunhu ta landifa oshipandi shomafuma atano, ndele ote shi ningi ashike N$20.00. Aaye! Nashi xule. Efuma limwe nali koshe nande eedola omilongo mbali, ngaashi naanaa oshilama shoxuxwa ile omaadi eenyiki ile okapambu kombelela yoshingulu ke na ondilo.
Okanhepe kodjove naka ninge efele; ohaka longwa noudjuu. Eendado doiimati noikunomwa yetu nadi ndjekwe po. Noikwakunuwa ngaho ngaashi omaongo, owalende, omalunga.
Onda pandula eshi hatu ka hovela okufimaneka oikulya yOshiwambo, ndele hatu i landifa nawa, opo tu mone mo okafilinga kawana oku kandula po eemhumbwe dakwalukeshe domeumbo.
Mefano: Efano tali ulike ovalihongi vokoshiputudilohongo IUM Ongwediva tava li oikulya yOshiwambo [Efano: Mr T. Tuhadeleni]
[Omundokotola Edward T. Shikesho oku hole okushanga oinyolwa ya pamba omalaka nomifyuululwakalo dOshiafrika. Ota monika ko-emaila: eshikesho@yahoo.com]
