Omufyuululwakalo moshiwana shetu otau ende tau xupipala efiku nefiku, neefikola hadi lipyakidile noinima ya pamba omifyuululwakalo otadi monika komufipa weisho paife, osheshi kadihapu.
Nuuyoma SSS mOshikuku mOmusati, oyo ofikola imwe oyo ye litula mo ngeenge tashi ya koikwamufyuululwakalo, nakeshe omuhongi, nomuhongwa womosekundofikola omu oha kala ta yolele ketayoo, ngeenge efiku olo la shiivifwa, nomalipyakidilo ohaa kala a kwata moiti.
Omafiku 24 no25 April neudo, oo omafiku oo itaa dimbiwa mondjokonona yaNuuyoma SS, omolwoshivilo eshi.
Oshivilo eshi osha ninga omukalondjiikilile paife, nosha tamekelwe po omido daKanyenye, pefimbo lovahongi voomeme Alma Mupupa, meme Loide Aindaka, meme Saima Kandali, ooSimon Shiwanda, ooEddy Shikesho ooEnos Elifas, noomeme Joel Taimi.
Omukulunhufikola tate Elia Monde Mwiihangele okwa ti oshivilo eshi otashi twikile nokukala ko fiyo ofiyo, shaashi omo ashike hatu dulu okupopya oinima yetu ei twa fyuulula koomeekulululwa nootatekulululwa, noku i tyanghulila moohembudangele novanyasha.
Neudo, efiku eli ola tyapulwa nawa shimwe to nyengwa, nokoshivilo oku okwa li kwa paka. Ovakulunhu moshiwana kwali va fika ongaashi Elenga lakula laUkwambi tatekulu Ndilimani Iipumbu opamwe nomalenga aye, Omutalelishikandjo wehongo moshikandjolongo shaShikuku meme Hilja Angalo, Dr Edward Shikesho omukwatelikomesho woshihongwa shOshikwanyama kOshana, Meme Taliya Nali Shaimemanya omukwatelikomesho woshihongwa shOshindonga kOhangwena, opamwe nameme Martha Mwahomenange, novanambelewa va dja koAngola.
Poshivilo apa opa li yo eefikola odo hadi unganeke yo oivilo yoikwamufyuululwakalo, ngaashi Shituwa SS e kwetelwe komesho kumee Petrina Haikonda, Ponhofi SS e kwetelwe komesho komukulunhufikola wavo, Onawa SS, IUM Ongwediva, UNAM HP Campus, Ruacana High School, Onesi SS, Haudano SS, David Sheehama SS, I K Tjimuhiva CS, neefikola dikwao.
Elalakano loshivilo eshi okuyambula po nokufimaneka oikwamifyuululwakalo dOshiafrika odo tadi ende tadi kande omapunya paife.
Efiku eli neudo ola danwa kwa shonekwa nhumbi omufyuululwakalo tau nwefwa mo koikwateknologi nexumokomesho mounyuni wanakanena.
Oshivilo eshi osha li tashi wilikwa komupopi a fimana, ekoma, tate Mapeni Protocol Simon Kondjashili, oo ewiliko laye la li la denga mbada, ndele nakeshe umwe okwa li e udite ounambano!
Omupopi a fimana wefiku, meme Taliya Nali Shaimemanya, okwa popya mo oinima ya fimana moshipopiwa shaye, omo a ulika efimaneko leenghulunghedi, enwefemo lexumokomesho momufyuululwakalo, nanhumbi tu na okukwatela po nawa oikwamufyuululwakalo.
Elenga lakula laUkwambi, tatekulu Ndilimani, naye okwa popya oshipopiwa itashi ka dimbiwa, omo a yandja nokuli ondjokonona yomusholondodo womalenga neehamba daUkwambi, omo ovahongwa vamwe va li vehe shii sha nandenande.
Tete okwa li kwa longekidwa oxungi ya li ko oufiku wokupendukila oshivilo, noxungi ei oya li tai wilikwa kutate Mathew Shikongo, omukulunhu wOmalaka mOshakati SSS.
Oxungi hanga i ende nawa, kakele kuShiyenga shaNangobe oyo ye shi nyona, omo ovapopi vopoxungi opo, mwa kwatelwa omunawino momalaka, tate Simon Shiwanda, va dja ko nomitwe di li komapepe, shaashi Ina yOmawilandjila oxungi okwe i ya moshipala.
Poshivilo sho vene shomufyuululwakalo, ovanhu ova li va djala nawa inashi monika nale; tava fimaneke omufyuululwakalo.
Poshivilo opo tuu opo opa li pe na omafiyafano oidano, omo eefikola dihapu da kufa ombinga. Dihapu oda dana nawa, nokwa li nokuli shidjuu kovayandji voitwa mokuyandja oitwa, shaashi neudo eefikola lunga adishe oda dana nawa shimwe to nyengwa.
Oshili naau aha li ko koshivilo oku, ote lili ominwe. Oidano ya li tai danwa keefikola odo, aaye, napa ye omake.
Omupopi umwe a li poshiindingili opo, okwa ti oshivilo eshi oshi dule noivilo imwe yopashiwana, shaashi okwa li a fuuka neenghono. Vati elongekido ola li laNakupwe.
Koshivilo oku kakwa li ashike ku na oidano, oinyandwa nomalitango, ashike okwa li yo ku na eendja da telekwa nawa noda li tadi tokola elaka. Okwa li taku landifwa oshifima, ookahadashala, oshingali, omalodu oilya, omaungu, omingome, nongongola yoo vene.
Okakomitiye ka ungaunga nelongekido eli, mwa kwatelwa ovahongi vomalaka, ngaashi tate Kalushu, tate Tuhadeleni, Meme Shuuya ou a kala melongekido eli oule weedula omulongo nanhee lwaapo, otava dulilwa ko embale.
Pexulilo omukulunhufikola, tate Monde, okwa li a pandula aveshe ava kwali va fika nokwa popya ta ti “Natu twikileni nokuninga oinima ei ya fimana.”
Mefano: Mefano omu otamu monika okamati haka dana ka dja mofikola yaNuuyoma taka dana ke litula mo. Meme Petrina Hamukonda, a dja kofikola yaShituwa SSS, ta shiivifa eengudu domaudano opamufyuululwakalo odo da findana. Ongudu yopamufyuululwakalo ya-IUM mOngwediva oyo ya li tai mwenyeke efiku olo. [Ehokololo kuDr E. Shikesho]
