Ku Marx Itamalo /
Meya gwondoolopa Helao Nafidi okwa ti kutya uunandoka ongundu yawo ya hogololwa ishewe yi lele elelondoolopa lyaHelao Nafidi, otaya ka kala taya yambidhidha aanangeshefa aashona mboka haya ngeshefele mondoolopa ndjika.
Shaalukeni okwa holola puuyele ongundu yoSwapo nookansela yawo melelondoolopa ta ya ka tala unene kombinga yaakwashigwana mboka taya landitha momapandaanda, opo ya kale ayehe taya landithile pomahala ngoka ga tulwapo kelelo.
MoHelao Nafidi omu na aakwashigwana Aanamibia oshowo Aahangola taya ngeshefele pomahala ga yooloka mpoka inapu pitikwa oku ningilwa ongeshefa.
“Ongeshefa oya pumbiwa, ashike oyi na oku ningwa melandulathano,” Shaalukeni ta ti.
“Itatu ti inatu hala aantu ya ninge ongeshefa, ashike otwa hala yangeshefe melandulathano.”
Shaalukeni okwa li ta popi moongundathana dhe noshikundaneki shino Omutumwa yeshi ningi mOlyomakaya ga zi ko mOshikango.
Omutumwa okwa li a pula meya nguka kutya ongundu ye yoSwapo oya dhiladhila oku ka longela aakwashigwana yaHelao Nafidi omauwanawa geni uuna ya hogololwa yi kale onga ongundu ndjoka yi na iipundi oyindji melelondoolopa ndyoka, okuza pomahogololo gomomalelo gomiitopolwa oshowo gomoondoolopa.
Omagololo ngaka oga thanekwa oku ka kalako momasiku 26 Novomba.
“Onga ongundu yoSwapo tse natango otu li twiilongekidhila oku longela oshigwana. Mondoolopa yetu yaHelao Nafidi otwa longa mo omauwanawa ogendji ngoka twa ningila oshigwana, na natango otwiilongekidha oku tsikila noku yakula oshigwana moompumbwe dhasho odhindji,” Shaalukeni ta ti ngaaka.
Shaalukeni okwa thamuna ngeyi kutya muule womimvo ntano dha piti, elelondoolopa lyaHelao Nafidi olye shi pondola oku gandja olusheno, evi lya longekidhwa oshowo omeya kaakwashigwana yomondoolopa ndjoka.
“Ngele owa tala nawa, otwa li nomalukanda ogendji ina ga longekidhwa nawa. Ashike, omalukanda ogendji gomwaangoka ngashingeyi oga tembudhwa mpoka ga li naakwashigwana oya tembudhilwa pomahala ga longekidhwa kelelondoolopa.
“Omahala ngaka oge na omayakulo agehe ngoka aantu ya pumbwa,” ta tsikile ngaaka.
Gamwe gomomahala ngoka ga tothwamo komunapolotika nguka moka mwa tulwa aakalimo aatembudhwi yomoHelao Nafidi ongaashi, Omushambwa location (extension 17), Bonya location oshowo Olunkono location.
Shaalukeni okwa tumbula wo kutya olukanda Olunkono olwa pewa olusheno oshali oku pitila mopolohalama yepangelo yokuthikitha olusheno popeni naantu yiiyemo iishona. Opolohalama ndjika oyi li moshikondo shiikwamina niikwankondo.
“Olunkono olwa tema ngashingeyi sho ta tu popi nangoye ngeyika. Iilonga mbika oya longwa kelelondoolopa, oku kwatelwa komeho kookansela yongundu yoSwapo mboka ye li mo momwaalu omunene,” ta popi ngaaka.
Shaalukeni, ta gwedhako wo kutya ongundu yoSwapo oye shi pondola wo oku kala wo ya tungitha oontopa mondoolopa, unene pomahala ngoka ha ga matuka omeya gefundja.
“Ondiinekela owa koneke nawa kutya ondoolopa yetu oha yi kwatwa komeya gefundja. Omeya ngaka ohaga gumu nayi onkalo yoshigwana mwa kwatelwa omainyengo gasho osho wo omangeshefelo.
“Onkene otwa tungamo oontopa dha kola mpoka ha pu matuka omeya, opo oshigwana shetu naakalimo yomondoolopa ya kale taa inyenge ya manguluka noku ninga ongeshefa pwaa na omaimbo gasha,” ta thamuna ishewe.
Methano: Meya gwaHelao Nafidi tate Darius Shaalukeni.
