Eso olyo oshitopolwa shonkalamwenyo.
Ihe omathimbo gamwe omuyengeli gweso oha nyota mpoka ihapu vulu oku aluka nuupu.
Shika osho omaiyuvo gaJackson Muma sho a ti ko sha kombinga yeso lyomuhikingalo gwedhina Tunakie.
Muma ngoka oye omupopiliko gwElelo lyOndoolopa yaNgwediva okwa ti okwa hala okupopya nayalwe melelo lyondoolopa yawo opo ya pitithe oshipopiwa shopambelewa kombinga yekanitho enene ndino naasho ya dhengwa pomutima keso lyaTunakie.
“Onkundana oyali yetu thika noyetu dhenga pomutima. Nakusa okwa li e na oshindji oku longa, okwa li ha nyanyudha aantu pomauliko giipindi gondoolopa yetu. Otwa dhengwa pomutima oshilongo ashihe. Okwa li ha nyanyudha aagunguka naakuluntu wo,” Muma ta ti.
“Oshitalendi she osha li sha pumba; kapu na gumwe ta vulu oku longa emu fa. Otwa kanitha lela. Oshigwana ashihe shaNamibia osha kanitha.”
Tunakie oye gumwe omuhikingalo a li e eta iiyimbo yopamuthigululwakalo wOshiwambo yoomeme pondondo yopashinanena.
Tunakie okwa li wo oye gumwe gwomaantu mboka ya eta ondhelela (odelela) pondondo yopashinanena.
Nonando oongalo dhe odha li hadhi imbwa mOshiwambo okwa li gumwe a kala ha ka imba oongalo dhe pondje yoshilongo olundji; nAanamibia yalwe mboka kaye uvite ko Oshiwambo oya li haya nyanyudhwa wo koongalo dhe.
Vululukwa nombili Queen of Otyaka.
Methano: Tunakie. (ethano kuSelma Kristof naSaija Tega Kristof, make-up kuM Love Absalom)
