Aakwashigwana ya dhiki oonyala mevi molwa oshimeno shoAsparagus mEtunda

Aakwashigwana yomOshitopolwa shaMusati, unene tuu mboka yomomudhingoloko gwoshikunino shEtunda mOshikandjohogololo shaRuacana, oya dhika oonyala mevi noye li natango inaya uvithwako kombinga yoshilongitho shoka taya ti osho tashi keelele omvula moshitopolwa shawo.

Aakwashigwana otaya ti moshikunino shEtunda omu na eshina nenge oshilongitho tashi longithwa kehangano ndyoka li li ta li limi oshimeno shedhina Asparagus, opo omvula kaayi loke oshoka oAsparagus kayi hole omeya gomvula.

Ehuliloshiwike lya zi ko okangundu kaakwashigwana oka li ka ningi omunyanyo gwehololomadhiladhilo mEtunda e taya gandja omanyenyeto kaawiliki yopapolitika mboka ya li ya holoka pamwe naGavena gwaMusati tate Erginus Endjala.

Aakwashigwana mbaka oya li ya pulwa opo ya ulike eshina nenge oshilongitho shoka ya itaala osho tashi longithwa mokukeelela omvula, ihe aakwashigwana oya li inaya ulika eshina ndyoka ihe oya ti olya holekwa.

Okashina hoka ka li oko ka monika oko okashina taku tiwa okoku tala onkalo yombepo.

Gavena Endjala okwa ekelehi omanyenyeto goshigwana shoka tashi ti okwa kala eshina tali longithwa moku keelela omvula, ta ti omvula itayi loko nawa molwa elunduluko lyonkalo yombepo ndjoka ya lunduluka uuyuni awuhe.

Ihe nande ongaaka aakwashigwana oya dhika tuu oonyala mevi, taya ti omvula ndjoka ya li ya loko moshitopolwa shawo pethimbo ya li taya kutha ombinga momunyanyo otashi ulike kutya eshina lyoku keelela omvula olya li lya dhimwa kooyene yalyo molwashoka oya haluthwa konkundana ndjoka kutya otaku kala omunyanyo gwehololo madhiladhilo koshigwana sha geya.

Methano: Oshimeno shoAsparagus nomidhi dhasho. Oasparagus ohayi tumwa pondje yoshilongo.