Osipana yetanga lyokoompadhi ndjoka hayi yambuka mOshitopolwa shaHangwena noya tseyika nawa mokudhana okatanga kokoompadhi yedhina Eshoke Chula Chula osho ya dhengwa mo muudhano wa hugunina woTop Score Oshiwana.
Chula Chula ngoka oye a li a sindana ekopi lyOshakati Mayoral Cup momwedhi gwaMei nuumvo, okwa li ta ulike oonkondo momaudhano ngaka gaTop Score ga dhanenwa mokapale kedhina Embandu mUukwangula, ookilometa omulongo pondje yaShakati.
Chula Chula okwa li ta ulike omulilo, e ta dhenge mo osipana yedhina Eleven Boys yaza kOgongo nookola ndatu monola opo a mone ompito yokudhana uudhano wa hugunina.
Omaudhano ngaka ga li ko okuza mEtine sigo mOsoondaha oga hulu nduno sho Chula Chula ya thigathana othika mokapale nosipana yedhina Pameiras hayi yambuka mOshana.
Ihe Chula Chula ineshi pondola, nokwa dhengwa mo nookola 12 dhomo 11 koopelendi. Ano Pameiras oye a sindana po ekopi lyoTop Score Oshiwana Tournament lyonuumvo.
Methano: Omudhani gwoChula Chula Moses Shidolo ota pewa esindano lyawo komukuluntu gwaTop Score kOnooli tate Joshua Sam, osho wo omukuluntu gwopolisi mOshitopolwa shaOshana Commissioner Naftal Lungameni Sakaria.
