Martin Negumbo /
Ehangano lyokuandjaganeka moshigwana oohi dhokulya, oNamibia Fish Consumption Promotion Trust (NFCPT), olya gandja oshimaliwa shit hike poN$300,000 opo shi ka kwathe mokutunga okapale okanene komaudhano mOndangwa.
Ngoka e li omukuluntu gwehangano lyoNFCPT tate Victor Pea okwa hokolola nkene a pulakene ekemo lyElelo lyOndoolopa yaNdangwa sha ningilwe kuulalelo wowina mboka wa li wa unganekwa kElelo molwa ompumbwe yoshimaliwa shokutunga po okapale.
Konima Pea oya kundathana nelelo lyehangano lye opo ya tale kutya otaya gandja ekwatho li thike peni kelelo lyondoolopa yaNdangwa omolwa ompumbwe yoshimaliwa tashi pumbiwa moku longa okapale kaayehe hoka ka tamekelwe kuyele nuumvo.
“Uudhano owu li oshinyangadhalwa sha simana unene kaagundjuka omolwa onkalo yokwaahe na iilonga nosho wo oku yambula po oshitopolwa uuna tashi ya komayinyanyudho,” Pea ta ti.
Peya pethimbo a gandja oshipopiwa she pegandjo lyoshimaliwa sheyambidhidho okwa pandula elelo lyondoolopa yaNdangwa opamwe naawiliki yalwe yopopepi nOndangwa.
Okwa tsu omukumo oshigwana shi tsikile noku pula omakwatho okuza kehangano ndika.
“Aantu tu dhiginineni wo okulya oohi opo tu kale tu na uukolele noonkondo dha gwana,” Pea ta ti.
Pea ta gwedha ko ta ti okwa inekela ekwatho ndika lyoshimaliwa sha gandjwa koNFCPT shoN$300,000 sha pewa elelo lyondoolopa oyo tuu ndjika shika otashi kala oshiholelwa oshiwanawa komahangano galwe.
“E ete po lyokapale haka kalishi uuwanawa womuntu gumwe nenge womuhoko gumwe, ihe ekwatho ndika otweli taambako nomaako agehe oshoka kehe omuholi gomaudhano ota kala a mbilipalelwa kwaashika,” tate Ismael Namgongo ngoka oye omunambelewa omukuluntu gwElelo lyaNdangwa ta ti.
Petrus Shipanga ogumwe gomaawiliki yelelo lyondoolopa nkwa thamuna nkene sha pumbiwa opo mOndangwa mu kale mwa tungwa okapale komaudhano ke li pamuthika opo ashike aagundjuka mboka ye na uunongo moku dhana uudhano ya kale ya mangululwa yo ya tale nkene taya yambula po iitalendi yawo.
Meme Julia Kapia ngoka e li omunashipundi gwokomitiye yelelo lyondoolopa naye opo wo a li pegandjo lyoshimaliwa shika, nokwa gwedha po nkene u uvite uuntsa nenyanyu moku taamba otyeke yoshimaliwa shi thike mpaka.
Iilonga yomutungilo gwokapale oya tamekelwe oomwedhi dhaka pita, na oke liwe metifa natango. Ombinga yokapale yokuuzilo otayi ulike tayi ka pwa mbala muule wethimbo ehupi.
Methano: Omunambelewa omukuluntu gwaNdangwa, Ismael Namgongo, nomuwiliki gwehangano NFCPT, Victor Pea, taya taambathana otyeke yoshimaliwa shoN$300,000.
