Meme Magdalena Kambudu ngoka a tseyika nawa molwa uunkulungu we momusika, unene tuu momaimbilo goku tanga Omuwa mongeleka yaELCIN, okwa li a pewa e simaneko lye mu opalela sho a lukilwa epandaanda mondoolopa yaNgwediva.
Shika osha li sha ningwa momasiku gane gomwedhi Desemba.
Meme Kambudu ngoka a valwa muDesemba gwomumvo 1943, a valelwa mOnayena, mOshitopolwa shaShikoto, oye omulongisikola paithano.
Ngashiingeyi oku li moshipundi shevululuko, e na oomvula 81.
Monkalamwenyo ye okwa longo iilonga ya simana konima sho a li a pewa ompito e ki ilonge koshiputudhilo shedhina Sibelius Academy moshilando Helsinki shaSoomi (Finland) momumvo 1966 sigo 1970.
Konima yeilongo lye okwa pewa odigrii moomusika dhopangeleka osho wo onzapo mokuhika opiano.
Kambudu okwa dhana onkandangala onene meyambulo po lyomaimbilo gehangano osho wo goongundu dhomalwiimbo mongeleka yaELCIN.
Oshilonga shimwe shopandjokonona sha simana sha zi muunongo we osho eimbilo lyehangano ndyoka lya li lya nyanyangidhwa momumvo 1987 moka a li a kutha ombinga onene moku li nyanyangidhitha.
Shimwe shomiinima ya simana e yi longo osho enyanyangidho lyokambo kuunongo-longo womusika kedhina “Ilonga elaka lyomuusiki” ka nyanyangidhwa momumvo 1990.
Methano: Minista gwOmayambulopo gOondoolopa nIitopolwa yokOmikunda tate Erastus Uutoni osho wo Gavena gwaShana tate Elia Irimari, naMeya gwaNgwediva tate Taarah Shalyefu, opamwe naakwanezimo yameme Magdalena Kambudu ya yelutha okapeleki kedhina lyepandaanda ndyoka e li lukilwa.
