Omulongwantu a tseyika nawa moshimpungu shelongo lyopombanda Omuprofesori Joseph Diescho, omvalele yaNamibia ngoka ngashiingeyi e li koGermany, okwa popi ohela kutya oshike naanaa shemu yitha ontuku.
Diescho okwa popi ohela komatango pakwatathano lyopangodhi noradio yoEagle FM.
Omuwiliki gwopolohalama Wonder Guchu okwa pula Diescho omapulo ogendji, ngoka ga yamukulwa nomwenyo gwapolimana.
Diescho okwa hokolola ta ti Namibia okwa fa naanaa iilongo konyala ayihe yaAfrika mbyoka ya nyengwa oku yambuka po molwashoka aaleli yayo inaya tula uuwanawa woshigwana komeho.
Diescho okwa popi oshindji e ta hokolola nkene a kanitha iilonga momukalo gu limbilika, ta ti kutya okwa pula aakuluntu yepangelo ihe oya ndopa okumu lombwela kutya okwa ningi shike naanaa oshiwinayi opo a kuthwe miilonga ye mbyoka a li oye omukuluntuwiliki gwendiki hali dheula aaniilonga yepangelo oNIPAM okuza momumvo 2013 sigo 2015.
“Onda popi naapevipresidende ayehe yaali, nakusa Sackey Iyambo, osho wo kuume kandje Nangolo Mbumba, naPresidende Pohamba onda popi wo naye. Ihe ayehe oya nyengwa oku popya kutya onda yona shike lela,” Diescho ta ti.
“Omupresidende okwa li a pulwa momasiku 9 gaAguste 2019 moshigondi shoSwapo sha li sha ningilwa moRundu, kutya ano Diescho okwa ninga shike? Ihe eyamukulo lyOmupresidende kutya onda yona shike olya li lya yemateka ndje nayi noonkondo.
“Omupresidende okwa yamukula ta ti epuko lyandje olyo ndi: Shotango, anuwa okwa uva kutya lwomoomvula dho1993 kandali omukwaSwapo a gwana; oshitiyali inandi futa iifuta yomeya nolusheno lwegumbo lyandje omanga nda li omuniilonga gwehangano lya yama kepangelo; oshititatu ohandi nyolanyola nayi unene (miikundaneki); oshitine kandi na egumbo moKavango – ohandi lala momisiona yaKatoolika ngele ndeya kegumbo.
“Iinima mbyoka oyo omatompelo ngaa omawanawa gokutidhitha ndje miilonga?”
Diesho okwa ti okwa yemata natango oshoka okwa ningwa nayi unene komuleli gwoshilongo.
“Andola onda li ndi li mepipi lyomimvo omilongo mbali andola otandi thikama e tandi kondjitha epangelo li ze ko koshipundi ngaashi sha ningilwe naanaa moTunisia niilongo yilwe yAaraba,” Diescho ta ti.
Diescho oye gumwe gwomAanamibia aashona yena oodegree odhindji dhuulongelwe. Okwa kala ethimbo ele ta longele koSouth Africa koshiputudhilo shopombanda shaUNISA.
Ihe ngashiingeyi oku li koshilando Bonn shaGermany hoka ta ti okwa yi ko oshoka ita vulu we oku mona omboloto moNamibia medhina lyomuleli gwoshilongo ngoka kemuhole.
Okwa ti wo ita vulu oku kala moNamibia nombili oshoka Omupresidende okwa popya kutya Diescho oye omutondi gwoshigwana.
Methano: Omuprofesori Joseph Diescho. (Ethano ku unam.edu.na)
