Aantu otaya si moNamibia sha fa uudhano. Konyala kehe oshiwike tuu okutameka oomwedhi mbali dha piti otaku lopotwa kwa sa omunenentu gwontumba moNamibia.
Ngoka a li a hulitha tango omunenentu oye tatekulu Matheus Shikongo, a hulitha momasiku 13 gaMei nuumvo, kwa lopotwa kutya okwa hulitha kombuto yomukithi gwoCorona. Shikongo okwa li nale oye Meya gwaVenduka.
Miiwike ya landula ko okwa lopotwa aanenentu taya hulitha, konyala taya pitithaathana po omasiku pokati, taku si nguka e taku hulitha gulwe.
Yamwe mboka aawiliki yomoshimpungu shopolitika omwa kwatelwa tatekulu Mburumba Kerina, moshimpungu shuuwiliki wopamuthigululwakalo ya hulitha oyo tatekulu Vekuii Rukoro omukwaniilwa gwAaherero, natatekulu Kilus Nguvauva omukwaniilwa gwAambanderu.
Moshiwike sha zi ko okwa lopotwa kutya moshimpungu shetanga lyokoompadhi omwa dhengwa ondhimbo sho omusamane Lucky Richter a hulithile koSouth Afrika. Richter okwa li omudhanitanga a tseyika nawa moKatutura oomvula dhonale nokwa li a ningi omudheuli wosipana wo yopashigwana yoUnder-23.
Konima owala yomasiku gontumba okwa lopotwa ishewe kutya omusamane Forresta Nicodemus, ngoka a tseyika nawa nedhina ‘Forra’ mOvambo Lokasi okwa hulitha wo. Forra okwa li omudhanitanga a tseyika nawa lela koyendji unene tuu aalanduli yosipana yedhina Tigers.
Omasiku ngano okwa lopotwa tatekulu Chief Samuel Ankama a hulitha. Ankama okwa li omupevi-minista oomvula dhonale, ihe oomvula ndhika okwa kala omukuluntu mombelewa yaPresidende.
Mombelewa yaPresidende omwa lopotwa mwa hulitha aantu yalwe ya thika puyatano muule ashike woomwedhi mbali dha piti.
Maanenentu yokOnooli omwa lopotwa kutya ngoka a li nale kansela gwOshikandjohogololo shaEtayi tatekulu Bernardinus Shekutaamba okwa hulitha oshiwike sha zi ko.
Nando aantu otaya hulitha moshili, unene ngaa aakokele, oshigwana shimwe unene tuu shaagundjuka natango osha tangananeka ashike omutse shaahe na ko nasha noonkambadhala dhoku lwitha etaandelo lyombuto yoCorona.
Methano: Oye tatekulu Chief Ankama ngoka kwa lopotwa a hulitha omasiku ga zi ko. (Ethano kuNew Era)
