Momasiku 26 gaAguste gwomumvo 1966 ongundu yaakwiita yetanga lyoPLAN (People’s Liberation Army), ewawa lyokakulumbwati lyoSwapo, oya li ya meneka taya ilongekidha momuthitu gwedhina Omugulugwombashe, moshilongo shUukwaluudhi, opo ya tameke iiponokela yokulwitha epangelo lyokatongotongo lyaSouth Africa ndyoka lya li tali kolonyeke Namibia (South West Africa).
Aakwiita mbaka ya li mewiliko lyakomanda gwawo John yaOtto Nankudhu oya papala ashike ye wete omadhagadhaga gomutondi taga gwitha aakwiita yawo momudhingoloko.
Nankudhu okwa li ina tegelela eponokelo ndika. Ihe okwa komanda aakwiita ye opo ya umbe. Ondjembo yoPLAN sho ya topa oya yamukulwa kondjembo yomutondi ngoka a li oye Etanga lyEgameno lyaSouth Africa osho wo iilyo loPolisi yaSouth West Africa.
Aakwiita yoPLAN oya li ye na ashike oondjembo dhoku umba e to fadhuka po, ihe omutondi gwawo okwa li e ya i ilongekidha a pama po pevi. Ano konima yokathimbo kowala aakwiita yoPLAN oya fadhuka po, yo yamwe e taya kwatwa nomwenyo.
Mwaamboka ya li ya kwatwa omwa li komanda John yaOtto Nankudhu “Koshiwanda”.
Nankudhu, pamwe nayakwawo, okwa ka pangulwa e ta tokolelwa egeelo lyonkalamwenyo mondholongo, ihe okwa ka mangululwa momumvo 1985 konima sho a kala mondholongo oomvula 17.
Nankudhu ngoka a li ngaaka a komanda nokutopitha ondjembo yotango yoSwapo mo1966 okwa dhana onkandangala onene mondjokonona yekondjelomanguluko lyaNamibia. Okuza esiku ndyoka lyaMugulugwombashe, ondjembo yoPLAN oya kala tayi topa sigo omulyotango lyaApilili 1989.
Nankudhu okwa si momasiku 21 Juni 2011, e ta fumvikwa mOmawendo gOmapendafule mOvenduka.
Methano: Komanda John yaOtto Nankudhu (ethano ku klausdierks.com).
