Kapoko nejukujuku lye
kuMartin Negumbo [okayolithi]
Omusamane Kapoko omunangeshefa e na ombaa onene, ngeyaka haku tiwa oshambina, hayi shingitha omalovu galookathana yo tayi mwenyeke aantu.
Kakele komakende goshikaliha oku na mo wo oradio yoomusiki, ndjoka haku tiwa endjukundjuku, hayi kwelengendja nekudhilo lyayo ohali uvikila kokule noonkondo.
Ekwelengendjo lyoongalo ohali hili aantu yomomikunda dhopopepi opo ye ye ya ikuthe enota, yo taya thigi po uuthilinga wawo. Aantu mboka ihaya nu, unene tuu aakokele, oya li wo haye ya oshoka Kapoko oku na po okaminishopa taka landitha uusuuka osho wo uundooha woohi, nuushikependjewo.
Shika osha ninga Kapoko a kale e na ooshako nokwa ningi omulumentuuntuu moshitopolwa.
Shampa lya ningine, ejukujuku lyaKapoko ohali patululwa lela lya pwa ko naakalimo yopomudhingoloko ihaya iyuvu uuna taya popi momagumbo, naashika osha eta aantu ya kale haya kala ya mana oku popya omutenya.
Aantu yomomagumbo ga kundulukidha ongeshefa ndjika oya gandja omakemo gawo kumwene gomukunda ihe mwene gomukunda okwa lombwelwa kuKapoko kutya ongeshefa osho yi lile po.
Egumbo lyaKapoko olyi li mondoolopa omanga ongeshefa yi li komukunda, onkene ekudhilo lyiihikomwa ihali thikiko kuye.
Aantu sho ya loloka molwashoka ihaya kotha we oomposi oombwanawa sho uusiku wa ninga po waKapoko nejukujuku lye, oya tameke taya gandja omanyenyeto kehe esiku kumwene gomukunda e ta loloka wo komakemo goshigwana.
Ihe Kapoko okwa li omutangalali, a dhina aantu. Oha kala ta popi a tuwalala ta ti: “Okamwene komukunda keni otaka ningi shike? Ngaye noho ovetelana, ohailwa yokakulumbwati, nda nyenga neembulu.”
Mwene gomukunda omukotoki tate Martina okwa dhiladhila nkene e na oku kandula po uupyakadhi. Esiku limwe okwa tameke ha dhengele Kapoko kongodhi yopeke noyokopaala pethimbo limwe, ha dhenge okuza potundi ombali yuusiku.
Kapoko sho ta yamukula ndji yopeke e teyi tulapo yo otelefona yokopaala otayi lili. Sho ta tulapo yokopaala ndjiyaka yopeke oya tameka. Mwene gomukunda oha popitha Kapoko nombili e temu lombwele ehokololo li na sha nekudhilo lyoshambina ye. Ye Kapoko ta yamukula nomayipopilo gayooloka.
Sho ya mana kupopya kwaandji yopeke, ye tate Martina ota dhengele Kapoko ishewe kwaandji yokopaala ta endulula tuu oshinima shoka a popi nale.
Osho sha kala ngaaka uule womasiku gatatu, Kapoko iha kotha we aluhe ota matukile owala oongodhi sigo a loloka.
Ongodhi yopeke oyi li nawa andola oshoka onamba yamwene gomukunda ota vulu oku yi mboloka. Ihe yokopaala oya li ya nyenga Kapoko oshoka omukadhi okwali omupangi, ha longo osikofa yuusiku, nokwali e hole okudhengela mwene pethimbo lyokoongulasha, ha dhengele kongodhi yokopaala oshoka oyo hayi ulike kutya mwene okwa lala megumbo.
Ano Kapoko ka li ta vulu oku nakula ko omutse wongodhi yokopaala opo yi kale itayi lili we.
Kapoko okwa yi kukansela, tanyenyeta: “Ngaye onda eta oompito dhiilonga pomukunda. Ngaye noho onda yambula po ehumokomeho lyoshitopolwa sho ngashiingeyi aanamikunda itaya yi we kokule oku konga omainyanyudho.
“Neliko lyoshigwana olya yambuka po wo sho okamini kandje ka konda aakulupe omagulu noinaya pumbwa we okulefa ya ye koositola dhokoondoolopa.”
Kapoko okwa gwedha ko ta ti: “Ihe mwene gomukunda ota piyagana ashike nangaye, mbela ondumbo nasho. Onda loloka oku dhengelwa kuye oongodhi dhomokati kuusiku. Onda hala a lombwelwe. Oongodhi tadhi lili kehesiku mokati kuusiku! Itatu kotha we! No!”
Tate Kansela okwa kutha ongodhi e ta dhengele tate Martina manga Kapoko a kuutumba; kansela okwa yi moonkundathana pangodhi namwene gomukunda, a tula ko okambako opo Kapoko a uve ko wo sho mwene gomukunda ta popi.
Mwene gomukunda okwa ti: “Tate kansela, lombwela omusamane ngono kutya ekudhilo lyoongodhi dhe hwepo oshoka odha mwene, na ishewe oku li nawa sho ihaa kotha molwa ekudhilo tali zi miinima yemwene.
“Tse mba ihaatu kotha keradio kaalishi lyetu?”
Okuza mpoka Kapoko okwa ngambeke ekudhilo lyoongalo mongeshefa ye. Shi ninga ombwa oshoka omuntu omukweni oteshi ku ningile wo.
