Endiki hali dheula aagundjuka muunongo wiilonga yomoomina nuutekenika lyedhina Namibia Institute of Mining and Technology (NIMT) otali wayimine ongundu yaagundjuka mboka taya ka opalekulula nokupainda omakuma goshipangelo shaKatutura.
Ndhika odha popiwa kuRobert Maseka ngoka oye omukuluntu gwoRob Youth Foundation ndjoka tayi ka kwatela komeho iilonga mbika.
Omukuluntuwiliki gwoNIMT tate Ralph Bussel okwa popi metiyali lya zi ko ta ti endiki lyawo olya tala ko sha simana oku kutha ombinga miilonga mbika yoshigwana.
“Nonando opu na okamaliwa okashona, onawa ngele tatu tuleni uukuni kumwe opo ku longwe oshilonga oshiwanawa ndele haku painda ashike omakuma,” Bussel ta ti.
Omahangano gamwe nago wo ga ti otaga kutha ombinga ongaashi Hilti naNEO Paints.
“Otwa hala opo NIMT a kale thimba yinongodhi miilonga mbika, tse atuheni tatu kala aayambidhidhi,” omusamane Maseka ta ti.
“Elalakano lyetu olyo oku longa oshilonga oshiwanawa shoka tashi ka ulika kutya aagundjuka otaya vulu shili oku kutha ombinga meyambulopo lyoshilongo.
“Koneka kutya oshigwana shi na uundjolowele osho tashi vulu oku longa iilonga tayi shi humitha komeho. Opo nduno nena otwa hala oku kutha oshinakugwanitha shoku ninga nawa omahala goshigwana moka haya monene eyakulo lyuuhaku.”
Maseka okwa gwedha ko ta ti aagundjuka kaye li po ya kuutumba owala ya tegelela oku pewa iilonga, ihe otaya vulu oku thikama e taya kutha ombinga miinyangadhalwa tayi humitha oshigwana komeho.
“Otwa pumbwa ashike aantu ya gandje ompito kaagundjuka; aagundjuka naya pewe olweedhe ya pite komeho e taya pungulula egumbo Namibia li yambuke po paliko.”
Methano: Ekuma ndika lyondunda yaavu moshipangelo shaKatutura kali li monkalo ombwanawa, ihe Rob Youth Foundation nomahewa ge otaya ka ninga po sha.
