Ombaanga yedhina Nedbank Namibia oya patulula oshitayimbaanga meni lyositola yedhina Woermann & Brock mOmalinda (Mariental).
Moshitayimbaanga shika otamu kala aaniilonga yane yombaanga taya yakula oshigwana pethimbo alihe ositola ya patuluka.
Sho oshitayi shika sha patululwa momasiku 21 gaJuli, ombaanga ndjika oya gandja oshimaliwa shi thike poN$10,000 oshali shamuhongi komuhongi Johan Eiman gwoVGK Sop Kombuis Mariental, ehangano hali gandja omakwatho kaakwashigwana yaMalinda ye na ondjala.
“Otwa mono ompito, e tatu eta nduno omayakulo getu ngoka ga pumbiwa unene mondoolopa yaMalinda, opo tu vule okuyakula ookasitoma dhetu nomayakulo gopombanda,” omupopiliko gwaNedbank Namibia Selma Kaulinge ta ti.
“Shika kashishi ashike oshitayi showala shi li mositola, ihe osho ethano tali ulike kutya Nedbank Namibia ota kala po aluhe oku ku kwatha wu ninge omahogololo omawanawa ge na sha noshimaliwa shoye.”
Peegululo lyoshitayi shika opwa li aantu ngaashi Meya gwaMalinda meme Cherien Kock, aaniilonga aakuluntu yombaanga mwa kwatelwa Nicholas Christians, Erastus Haihambo, Gernot de Klerk, osho wo aanangeshefa yamwe yomOmalinda.
Methano: Omuwiliki gwaNedbank Namibia gwomahala gokuumbugantu nokefuta Nicholas Christians, omupopiliko omukuluntu gwaNedbank Namibia Gernot de Klerk, Mayola gwaMalinda Cherien Kock, nomukuluntu gwoshikondo shomikuli dhopaumwene Erastus Haihambo.
