Namibia okwa dhengwa ishewe pomutima sho onkundana ya thiki ohela tayi ti Omupevi Pilima Minista-kwali tate Marco Hausiku okwa hulitha.
Hausiku ngoka a kala wo oshilyo sha simana shongundu yoSwapo osho wo omukondjelimanguluko okwa li gumwe omuwiliki gwopombanda mepangelo lyaNamibia a yambukile koshitopolwa shaKavango.
Omuleli gwoshilongo Presidende Hage Geingob okwa ti: “Eso lyaHailwa Marco Hausiku, omukondjelimanguluko omuinekelwa nomupiya gwoshigwana omuwanawa, olye tu dhenga pomutima.
“Otandi gandja omahekeleko peha lyEpangelo osho wo lyongundu yoSwapo, komukwathi gwe, uunona, aakwanezimo osho wo oohailwa ayehe.”
“Sho Hailwa Marco Hausiku a si mesiku lyomapendafule, 26 Aguste, otashi ulike uukwatya niilonga mbyoka a longa mekondjelomanguluko lyoshilongo osho wo mehumokomeho lyaNamibia ya manguluka.
“Omwenyo gwe nagu vululukwe nombili,” Omupresidende Geingob ta ti.
Eso lyaHausiku olye ya ngeyi konima ashike yoshiwike shimwe sho nakulwa gulye ngoka a li wo omuminista Kazenambo Kazenambo a hulitha. Iiwike iyali ya piti okwa li kwa fumvikwa wo Minista gwElongo lyoPombanda meme Veno Kauaria.
Ayehe yatatu, Kauaria, Kazenambo naHausiku, okwa lopotwa ya hulitha molwa omukithi gwoCovid-19.
Methano: Ongudhi yoSwapo Party Marco Hausiku ngoka a li wo oye omupevi gwahamushanga gwongundu, taya tyapula mpano pamwe nahamushanga gwoSwapo meme Sophia Shaningwa.
