Ookansela dhiikandjohogololo ngele taya popi moradio kombinga yaantu ye na uulema inaya kala we taya tumbula iitya mbyoka tayi kutha ko ongushu nenge tayi uvitha nayi aantu mbaka.
Ndhika odha li dha popiwa komunashipundi gwehangano lyaanuulema lyedhina Namibian Federation of People with Disabilities in Namibia (NFPDN) meme Julian Samuel.
“Alikana longitheni iitya ‘aantu ye na uulema’, ihe inamu tya we ‘iilema, iingundu, niitiningili,’” meme Julian Samuel osho a lombwele ookansela.
Ookansela yElelo lyOshitopolwa shaShana oya li ya gongala mOshigongi shawo shElelo lyOshitopolwa mOshakati, noya li ya ithana opo omahangano gaantu ye na uulema ge ye ga popye nayo moshigongi muka oshoka oga li ga pula opo ga pewe ompito.
Meme Julian okwa ti ookansela dhimwe ngele tadhi popi moradio ohadhi longitha iitya kayi li nawa. Okwa ti wo kutya inaku kala we taku tiwa ‘aantu taya lumbu nuulema’ ihe naku tiwe ‘aantu ye na uulema’. Julian okwa li wo a gandja oofoloma kookansela opo ya ka nyole aantu ayehe mboka ye na uulema miikandjohogololo yawo.
Meme Emma Amadhila omunashipundi gwehangano lyaanuulema womeho oNorthen Association of the Visually Impaired okwa li wo moshigongi shika, osho wo meme Anna Kambowe ngoka e li omupangi-hungimwenyo gwaantu ye na uulema mOshipangelo shEpangelo mOshakati.
Meme Anna okwa li a gandja uuyelele kookansela kombinga yankene omunuulema e na okweenda opo a pewe okatemba.
Oshigongi osha li sha kalwa kookansela adhihe dhoshitopolwa shaShana, mwa kwatelwa omunashipundi nokuli wo kansela gwoshikandjohogololo shaNgwediva Andreas Uutoni, kansela gwaKatyali Joseph Mupetami, kansela gwaKatana Edmund Ishuwa, nayakwawo.
Methano: Meme Julian Samuel, nomupevi gwe tate Pedro Nghishiwete taya popi moshigongi shookansela. Kolumoho otaku monika meme Emma Amadhila.
