Emanguluko lihe na oilonga ola fya
> Kafindani kaShimbide
Ohatu tyapuleni emanguluko laNamibia a dja moupika noukoloni wokatongotongo, oshilongo sha wanifa omido 31 demanguluko notashi lelwa kovanhu ovakwashiwana eedalele doshilongo.
Osha pula ohonde, oshinhwi nomahodi avahapu.
Nena eli otwa mangulukeni, hatu kofa hatu mbonyoka nohatu ende twa manguluka apeshe twa hala okweenda moshilongo shetu. Vo ounona otave lihongo keshe tuu eshi va hala shi kale omaifano avo.
Ndelenee oshinima shimwe nda hala ndishi popye nena eli, osho nee omhumbwe yoilonga. Ovanhu ovahapu unene vehe na oilonga moshilongo shetu sha manguluka.
Okuhe na oilonga oko haku eta oinima ihapu, oinima ii, omalipumo mumwe pokati kovanhu, unene tuu pokati kominghoko. Okakombo noludi ohaka etifwa kokuhe na oilonga. Oita yopashiwana ohai etifya kokuhe na oilonga.
Ngeenge omukomandandi umwe womatanga okwe li tukuka ko kuvakwao nde ta tameke oku kondjifa epangelo, ovanyasha vahapu ovo vehe na oilonga otava lotoka va ka kwate komauta pamwe naye shaashi otava ti “efyo noluhepo ashishe shimwe”.
Ovakwashiwana eshi tave lipumu mumwe paminghoko omolwaashi eemhito doilonga oda pumba opo nee keshe umwe ota shilile komunghoko waye, kepata laye nokeumbo laye.
Hano emanguluko lihe na oilonga ola fya.
Oshilongo shi li monghalo ii yokuhe na oilonga otashi kala sha nyika oukolokoshi, ouxwapindi, nomunyonena shaashi oshiwana shepupi lokomongula osha nyematifwa konghalo yokuhe na oilonga.
Oilongo ohai tungwa kovanyanyamaulu eshi tava nyengadala keshe efiku, tava longo, tava ningi eshi naashinya. Ashike ngeenge ovanyasha kave na eshi tava longo, otashi eta oupyakadi.
Hano ngeenge otwa hala shili emanguluko loshilongo shetu li kale la kola oshinima shimwe ashike osho tu neni oku ninga osho okweeta po eemhito doilonga shaashi oilonga oyo hai tungu oshilongo.
Omanga okuhe na oilonga ohaku teya po oshilongo.
